碧咸七千萬買島氹妻？ Victoria襲港巡舖做直播
「碧咸嫂」Victoria Beckham昨日襲港，轉裝後即到自家品牌店舖巡舖，全程勁Cool未有回應記者問題，及後在店內進行fb直播訪問即變「開籠雀」，吸引逾2,500粉絲睇直播兼派Like，門外亦有大批粉絲撐場，人氣爆燈！
雖似「Mall姐」般的工作狂，但Victoria講明再忙都不忘家庭，與老公有協議不會同時外出工作，講到母親節，她亦分享被仔女的小手作冧爆：「布魯克林（大仔）依家已經有啲過咗寫卡仔嘅時候，但夏柏（孻女）就係嗰個年紀，差唔多6歲，佢好愛返學同寫作，好鍾意寫信畀我，上面話：『媽咪你係我最好嘅朋友，我好愛你。』」一向Cool爆的她亦忍不住甜笑，更自言愛來港正因這裏有強烈家庭感！
完成訪問後，她戴超回復Chok樣離場，行程緊密的她今早會落舖出席VIP活動，下午轉到與溥儀眼鏡合作的Pop Up Store活動，緊接再飛上海。
此外，日前傳碧咸有意以約7,000萬港元於加勒比海買私人小島，送給老婆賀相戀20周年，知情人士則指傳聞為流料。