郭富城趁母親節放閃 拖凸肚方媛出巡
天王郭富城（城城）與內地女友方媛（Moka）上月低調結婚，兩人昨日於婚後首次高調出巡放閃，侍母至孝的城城拖實盛傳有孕的凸肚Moka為母挑選母親節禮物，並會合郭母食飯慶祝，風騷的城城更大讚老婆好煮得。
上月低調結婚的郭富城昨日孖太太方媛現身中環，約下午五時二十分，兩人以夫妻裝上陣，齊以黑色配牛仔Look，並戴上黑超及帽子，造型襯到絕，城城還戴上口罩，傳懷有三個月身孕的Moka薄施脂粉、穿厚底波鞋的她翹實城城的臂彎，全程小心翼翼，當見到記者時，Moka面露幸福微笑，並無刻意遮肚，但明顯腰肢圓潤不少兼肚凸凸。問到城城送甚麼母親節禮物給媽咪？他說：「要揀吓先！」之後兩人入了名店TOD'S揀選禮物。
努力學廣東話
逗留個半小時後，兩人挽手離開名店，問城城揀了甚麼禮物給媽咪？他說：「手袋。（第一年同太太一齊過母親節會點慶祝？）我唔會再答問題，問乜都唔答。」再問手袋是否跟太太一齊挑選，他點頭承認。之後兩人到附近一間鞋店，約二十分鐘後離開，雖然城城口說不再回答問題，不過當記者提到Moka日前在社交網站晒三餸一湯相，還以報紙墊枱被網民讚慳家，城城冧爆點頭再自爆：「佢（方媛）唔會答你，因為佢學緊廣東話。（太太係咪好煮得？好唔好食？）係呀，有食，OK啦！（你哋有好消息可以同大家分享未？）適當時候會講。」問他是否特意回港慶祝母親節？城城坦言：「係，啱啱拍完電影，有一日假，返嚟同媽咪慶祝，最緊要係陪媽咪，因為今日母親節，你哋都快啲返去食飯。（晚上會食飯慶祝？）會，依家返去食飯。」
陪母食「謝媽宴」
另外，城城昨日在微博上載「謝媽宴」的菜單感謝母親，他對此說：「呢個係攞嚟搞笑，我都覺得個菜單寫得好有心思。」城城全程表現風騷，心情大好，與老婆其後在附近的酒店門口登上七人車，由司機接載離開。約十五分鐘後抵達天后百富中心，城城先落車，再走到另一邊車門扶Moka落車，兩人翹手乘升降機前往餐廳與郭母食飯。
文：名人組
攝：追蹤組