唐詩詠被嘲32A港女身材未夠秤

前晚首播的無綫4K劇《不懂撒嬌的女人》有不少亮點「吸睛」，除了有闊別無綫多年的演技派林文龍與宣萱回歸外，還集合多位宅男女神包括唐詩詠、高海寧、孫慧雪及鄧佩儀等參演。劇集在上海、台灣及香港三地取景，探討哪個地方的女士最叻撒嬌，但識撒嬌又是否等於最得男士歡心？這個永遠沒有標準答案的議題一直熱爆網，難怪首播收視平均24.2點、最高25.3點，成績不俗。

真定假？證明我啱演！

前晚首集將「港女」與上海女生的身材作比併，詩詠買Bra時被雪雪取笑其32A上圍最能代表香港，而飾演上海妹的白雲則身懷「E Cup導彈」，笑「情敵」詩詠的32A猶如11歲身材，令她勁無奈！其後一幕「高炒」白雲的強勁胸器，畫面震撼，難怪雪雪笑對方不止是「警鐘胸」，直情是「大笨鐘」！

唐詩詠現實係咩「Cup」數？天有難測之「峰」雲也！	《不》劇除有「畫中畫」功能，還用上4K技術拍攝，連宣萱的頸紋也變淡不少。	白雲在劇中豪晒E Cup「大笨鐘」，唔睇你就笨！

對於網友熱議是否真實都是32A？詩詠受訪時笑說：「我個真實數字梗係唔會話畀大家聽啦！（尷尬？）唔會！都係角色需要啫！大家睇得投入我都開心，證明我好啱演呢個角色，大家唔會點質疑，記得繼續睇落去，仲有更加多嘅金句出現！」講到劇情似指港女身材不及內地女生，詩詠力撐說：「我覺得香港好多女仔都好好身材，內地女仔身材好嘅百分比係高啲，因為普遍身形較圓潤。」

天津出生的白雲飾演上海妹，指各地女生的身形、骨骼大不同，不等於港女身材差：「我唔知上海女仔係咪多數大胸，東北女仔就係大啲，但講緊係全身都圓潤啲。（劇情集中講你胸部，有冇尷尬？）冇呀！我哋希望直接將個矛盾點講出嚟，而且係喜劇，想多啲爆點。」

4K拍攝 頸紋ByeBye

另外，無綫力Sell的4K拍攝技術，畫面變清亮光滑，眾藝人皮膚變得更滑溜！已達中女之齡的宣萱，鏡頭下的頸紋亦變淡不少，劇集又利用畫中畫表達角色睇手機情節，甚有電影感，相信對觀眾帶來新鮮感。

文：影視組