黃宗澤上床似鹹魚冇晒夢想
無綫台慶劇《溏心風暴3》劇組昨日為關菊英、阮兆祥、李國麟及莊思敏四位五月壽星切蛋糕預祝生日。劇中扮演大情聖的黃宗澤明顯消瘦，他笑言拍激情戲拍到麻木，還被取笑是沒有夢想的床戲演員，猶如一條鹹魚。
無綫藝員夏雨、李司棋、米雪、關菊英、黃宗澤、王浩信、黃翠如、岑麗香、陳敏之、阮兆祥、李國麟、李成昌、莊思敏等昨日在將軍澳電視城為TVB 50周年台慶劇《溏心風暴3》開工，劇組為五月生日的關菊英、李國麟、阮兆祥及莊思敏預祝生日。
同人妻合作冇緋聞
飾演大情聖的黃宗澤於劇中女伴無數，床戲咀戲應接不暇，被嘲拍到變成沒夢想的床戲演員，他笑說：「導演笑我拍床戲好似條鹹魚咁，好似一個冇夢想嘅床戲演員。成日沖涼又除衫、床戲又除衫，自己真係拍到麻木。女仔仲尷尬過我，我都同佢哋講唔使尷尬，我已經拍到麻木咗。（現實中見到女仔會唔會麻木？）現實中忙到想麻木都冇得麻木，要趕拍第二套劇。」雖然女伴眾多，但黃宗澤卻少有地拍劇沒有傳緋聞，他說：「可能圍繞住我都係人妻、人夫同長輩，所以冇緋聞傳。」明顯消瘦不少的他被問到是否為網劇《飛虎極戰》操弗減磅？他否認特別減磅：「可能休息唔夠瘦咗，自己反而想增磅操大隻啲，都有問過啲真係做飛虎隊嘅朋友，佢哋都係好鋼條身形。」
關菊英生日唔敢攞假
下月3日生日的關菊英早前獲大家為她慶祝舊曆生日，問到新曆生日是否要開工？她表示不知道，亦不敢開口請假：「冇理由為咗自己生日去度期，不過就算放假都情願喺屋企休息。」關菊英更被阮兆祥改花名為「快活菊」，因她時常保持愉快心情，為大家帶來開心氣氛，還準備生果請大家吃。而李司棋也認同關菊英，放假情願好好休息：「又唔係唔夠休息嘅，最少都有三、四個鐘瞓，已經好知足。」
文：影視組