「摸索」緊陳展鵬單文柔唔埋男人堆
單文柔傳與陳展鵬拍拖後人氣急升，前日在將軍澳出席公開活動後，離開時獲粉絲主動上前邀合照，她亦友善地答應，然後與一班友人往附近醫肚。榮升「展鵬嫂」的她為照顧男友感受，全程避忌唔埋男仔堆，專黐女仔，食飽後與其中一名女友人搭的士前往附近屋苑，由友人按密碼入大廈，逗留至晚上仍未離開。
此外，單文柔昨日出席活動時被問到緋聞是否帶挈她多了工作機會？她說：「今日係第一個，工作都係公司安排，隨緣！」有指陳展鵬私下向公司承認戀情？她說：「其實我同佢仲係認識緊嘅朋友，報道出咗嚟都有啲壓力，普通朋友相處都會成為大家焦點。（會唔會因此卻步？）自己比較慢熱，需要時間相處，仲係摸索階段。（你話欣賞佢有承擔？）我欣賞佢為人有正能量同正直。（如果將來Confirm咗拍拖，會唔會公開？）將來事冇人知，如果將來真係拍拖你哋先再問我，依家仲係認識階段。」
