蔡思貝靠自己唔搵男友做司機
無綫小花蔡思貝早前被拍得座駕車牌前後不符，她昨日出席宣傳活動直認起初未有留意，更自爆友人指揸車會令她增添不少麻煩，難怪最終她靦腆回應：「以後會小心為上。」
蔡思貝、王君馨、裕美、馬國明及敖嘉年等昨午現身尖沙咀，宣傳劇集《心理追兇Mind Hunter》結局篇，一眾演員大玩遊戲，更「劇透」曹永廉是big boss，以心理戰術殺人，不少角色將陸續死去，鋪排與以往無綫劇集大相逕庭！
車底都check埋
而日前被拍得車牌前後不符的蔡思貝受訪時，坦言經記者提醒，翌日即更換車牌：「今次係因為跣胎撞到泵把，所以拎架車去整，師傅見個牌花花哋幫我換埋，我又冇留意，真係唔知錯咗，下次會連車底都check清楚。（報道出街後，警方有聯絡你？）冇，我真係唔知情，唔係咁大件事啫，但有朋友話架車會搞到我好麻煩。（娛樂圈有啲顏色唔得？）我嗰架銀色，要查吓，因為開工時間冇辦法，太夜收工搭的士又好貴，一定要自己揸車。（搵屋企人同男友幫手？）靠自己，以後小心為上。」
王君馨勁細膽
另外，王君馨於《心》劇飾演殺人魔，即將被撕去面具，她透露與扮演其兄長的曹永廉關係複雜：「我哋似師徒又似情侶。（首次接演此類角色？）係，之前我同老公去牧師屋企接受婚前輔導，佢個4歲囡囡見到我即刻指住電視，我同佢講做戲咋！（老公驚咗你？）佢睇開美劇，試過睇分屍場面，所以唔驚，我拍之前都有睇呢類劇做準備。」她又自爆其實自己「唔嚇得」：「當年同許家傑去睇張家輝套《陀地驅魔人》，我捉到佢損晒。（咁驚你又接？）拍嗰時冇配樂，況且我唔係好睇playback，交畀導演決定得唔得，我都係呢排追劇先知原來係咁！」她直言對本星期自己佔重戲份的收視有期望。
文﹕影視組