馬浚偉鴛鴦戲水：浸到皺皮都抵！
馬浚偉前晚與胡定欣拍攝一場出浴戲，鴛鴦戲水，他笑言現場色香味俱全，舒服到如做Spa般，笑說：「浸到皺晒皮都抵。」而同劇的周秀娜都不輸蝕，大晒「浴」照，拋個媚眼都殺死你。
藝人馬浚偉與胡定欣前晚於電視廣播城為劇集《宮心計2深宮計》拍攝一場鴛鴦浴戲份，馬浚偉與定欣分別飾演太子與太子妃，劇組搭了一個浴池景拍攝，雖然落雨，幸無阻二人雅興，齊齊露肩浸於花瓣浴池中，定欣更大晒鎖骨。上水後，二人笑言舒服到如做Spa、浸溫泉般，定欣更拍到開心晒V！
其實同劇的劉心悠、黃心穎及周秀娜早前已先後拍了出浴鏡頭，前晚輪到馬浚偉與定欣時，馬浚偉坦言拍得很開心：「浴池係實景兼有暖水同消毒過濾，成件事好專業，池中嘅花瓣真係好香，感覺好似做Spa咁，我平時好少做Spa，今次簡直係浸到唔想起身，浸到皺晒皮都抵！」劇組於現場貼心設置帳篷、暖風機及毛巾，「太子」與「太子妃」果然夠派頭。說到有美相伴，馬浚偉說：「有佢陪係好賞心悅目！環境又靚又香，色香味俱全！」
周秀娜露天浴場逐件剝
定欣亦讚馬浚偉造型：「佢平時紮起個頭，今次放低頭髮好野性！今次場口只係普通夫妻戲水。（有冇進一步埋牙？）錫吓額頭，都有啲房事場口，但喺廠景唔喺水。」她指第一次拍宮廷浸浴戲很興奮，感覺亦好新奇。至於周秀娜就於微博「出招」，上載多張早前拍出浴戲的劇照，但電視尺度所限，其32D胸器潛行水中不見天日，只露出白滑香肩，但她將古裝逐件剝兼拋媚眼，更留言：「露天浴場遇上天雨，妃子沐浴你以為容易啊！」
文：影視組