阿Sa衣錦還鄉 嫲嫲拉隊捧場
Twins前晚到蔡卓妍（阿Sa）的家鄉東莞舉行巡迴演唱會，雖然阿Sa的聲帶未完全康復，但無損粉絲熱情，阿Sa和鍾欣潼（阿嬌）都感動得眼濕濕。這晚阿Sa的嫲嫲不但現身撐場，更站起來揮動手上的海綿棒棒打氣，場面溫馨！
Twins相隔十幾年再返東莞開騷，全場爆滿，阿Sa的嫲嫲、親友及阿嬌的母親都有來捧場。當知道嫲嫲坐第十行，阿Sa即搞笑說：「點解老竇安排你坐第十行咁後？」她擔心嫲嫲看不清楚，嫲嫲就站起來揮動手上海綿棒棒打氣。
見「巨型彩虹」眼濕濕
回到家鄉的阿Sa十分興奮，用家鄉話唱了幾句歌仔，全場捧腹大笑。歌迷每一站都特別為二人炮製驚喜，繼星星燈、自製手幅後，前晚全場觀眾合力製造室內巨型彩虹。阿Sa和阿嬌感到非常震撼和驚喜，即時要求和全場觀眾來張大合照留念，更被熱情的歌迷感動得眼濕濕。
請假一星期養聲
完騷後阿Sa跟嫲嫲在後台合照，阿Sa還用美圖App將兩嫲孫變成貓女郎般可愛，她在社交網上載多張舞台上的靚相，更留言：「尋晚返自己嘅鄉下東莞開演唱會，好多親戚同我最錫嘅嫲嫲都嚟咗捧場，最衰嘅係自己嘅聲帶仲未好番，不過好彩有全場觀眾嘅萬人大合唱，同埋我嘅好拍檔、好姊妹、好戰友小嬌嬌嘅鼎力相助，先至順利完成到，好感動，有幾下真係爭啲喊，呢啲就係我哋組合嘅精神，同理尋晚歌迷會嘅應援真係好勁，個彩虹好靚，感謝大家！」阿Sa透露已經向公司請了一個星期假，她會好好休息養聲，準時覆診、食藥和戒口。
文：音樂組