何遠東腩汁搽身有味Tee吸師奶
憑劇集《心理追兇Mind Hunter》爆紅的何遠東，昨日與馬海倫及王歌慧設飯局請劇組食飯。遠東自爆拍攝時靠「臭味戲服」入戲，成功吸納大批師奶Fans：「好多媽咪好同情我，好錫我！」
何遠東早前憑無綫熱播劇集《心理追兇Mind Hunter》一炮而紅，昨日在將軍澳與馬海倫（Helen）及王歌慧齊齊設飯局宴請劇組食飯。眾人在席上分享拍攝點滴，何遠東自爆靠「臭汗衫」入戲，着足3日唔換：「事前將牛腩汁搽滿雙手同埋個身，仲特登唔洗戲服，等件衫有牛腩汁同汗水味！」問到劇集播出後是否獲得更多工作？他笑言吸納了不少師奶Fans：「我會努力做好每個工作，依家有廣告傾緊。佢哋話我個樣好親民，好多媽咪好同情我，同埋好錫我！（想憑角色攞獎？）一步一步嚟，我唔心急。」
「萬歲」宴請劇組
至於飾演其母的Helen對何遠東及王歌慧讚不絕口，並指拍攝時摑到王歌慧臉上留有手指印：「今日算係小型煞科宴，好開心阿仔同阿女做得好。當時第一次演戲嘅王歌慧仲畀我摑咗五巴，第一次畀我摑到有手指印，第二次畀我摑到出咗鏡！」問到可有被摑到面腫？王歌慧說：「冇，海倫姐好錫住我，仲教我做戲！」問到是次飯局由誰請客？馬海倫表示由演員齊齊夾錢，包括身在外地拍攝旅遊節目的楊明，她說：「我哋夾份請工作人員食飯。主角馬國明、思貝都開緊劇，楊明就出國拍旅遊節目，佢傳短訊嚟話要夾錢。」
文：影視組