Bob擁十個物業懶理毒咒

大把雄風 追仔No Problem

Nuts哥相信連阿Bob抓爆頭都諗唔明嗰位網友嘅動機，只可以話係網絡資訊發達，人人一機在手當王道，其實就係橫蠻霸道，在網上世界亂噏歹毒惡言自High發洩毋須負責。阿Bob都好有品，與其同個網民一般見識「開拖」有失身份，就嚟個借力打力，用網民威力起底「緝兇」令佢乖乘收口，果然高招過人。學Bob話齋：你可以侮辱我、攻擊我，但搞我「啲女」勢係假啦！阿Bob家中「4條Queen」視如命根，林太持家有道兼且旺夫有功，阿Bob娶咗呢個好老婆可以話係「風生水起」，竟然被罵只識生女，唔識生仔，冇仔送終？嘩……呢鑊欲加之罪，Nuts哥聽到都把幾火！阿Bob今年先37歲，正係男人最精壯人強、有氣有力之年，男人去到七十古來稀仍然可以做老竇，要追仔真係大把時間啦！

口咬「金門匙」 個個爭娶

況且呢個年代仲邊有話生女係蝕本貨o架！分分鐘賺凸都有之，而且有女嘅爸爸都深深體會到，阿女就如前世情人，令你冧滋滋！最厲害係阿Bob呢三個女好似運財童女嚟報恩咁，生一個就旺你一次，阿Bob旺到拍劇、拍電影、開娛樂公司做老闆，直情好似中頭獎咁款，由當初旺角600呎單位，住到上加多利山幾千呎豪宅，仲有10個物業揸手，保守估計身家過半億，可以話係生個金礦一樣，所以對阿Bob嚟講，一世活喺「女兒國」又何妨？阿Bob仲講到明手頭物業會留畀三個寶貝女做「嫁妝」，名副其實含住把「金門匙」出世，邊個話佢三個女「低低哋」？女大十八變，醜小鴨都變鳳凰，何況阿Bob三個女樣子可愛喎！愈大愈靚有幾奇！唔少圈中女神都係Ugly大個變Baby，阿Bob呢「3條Queen」分分鐘係未來港姐冠軍，到時大把男仔排隊爭住嗌佢一聲「外父」添！

翠如旺父 魚販變富豪

Nuts哥唔係亂噏盲撐o架！我眼見就唔少「外父相」嘅老竇先係好命公，要數當然係女神黃翠如個老竇啦！翠如BB家中有「五朵金花」，亦係「旺父」嘅最佳例證，當年翠如爸爸係魚販出身，後來轉戰建築，去年開嘅土木工程公司上市就平地一聲雷，股價暴升幾十級，事隔一年升幅74倍，市值二百幾億呀！啲錢可以話滾埋嚟！而BB男友蕭正楠都有得着，被喻被「億萬準女婿」，搞到Nuts哥都好恨生女打孖嚟，能夠父憑女貴！

Nuts哥