40歲影星奧蘭度布林與天后Katy Perry甩拖後不愁寂寞，近期傳撻着女星Nina Dobrev的他，前日更約埋「名模殺手」里奧勒度狄卡比奧去音樂節狂歡，奧蘭度於新歡Nina及舊愛Katy同場下，竟然與另一模特兒冧攬，艷福無邊！
奧蘭度布林（Orlando Bloom）上周與《吸血新世代》（The Vampire Diaries）28歲女星Nina Dobrev分別出席電影首映活動後齊齊食飯，有知情人士爆料指二人關係超越普通朋友，但暫時未進入認真發展階段！二人前日亦有去美國Coachella音樂節，但未有「合體」，女方在社交網大晒谷胸與友人合照，奧蘭度就孖「里奧仔」里奧勒度狄卡比奧（Leonardo DiCaprio）及杜比麥佳亞（Tobey Maguire）組成「型男三人組」出席音樂節派對。
現場人士更爆奧蘭度風流成性，大膽在Nina的15呎範圍外與31歲索模Ashley Haas親密互動，冧笑咬耳仔外，女方更High爆送抱，場面火辣辣，似乎奧蘭度堅享受「獵食」生活！至於奧蘭度前女友Katy當日亦被拍到低調現身睇Lady GaGa於音樂節的演出。
奧蘭度新歡舊愛共冶一爐咁搶鏡，里奧仔與杜比反而失晒色，撇低名模女友Nina Agdal「獨自去偷歡」的里奧仔，當晚未見與其他女伴煙韌互動，相當乖仔，不過同行就見小天王Justin Bieber的23歲模特兒前女友Chantel Jeffries，着上透視裝的她大晒身材，未知「情歸何處」！而Justin與奧蘭度曾因與對方的前度Selena Gomez及Miranda Kerr傳緋聞而不和，未知Justin見到奧蘭度與Chantel同行，會唔會又眼火爆？
另一方面，有指Katy今年2月尾與奧蘭度分手，正因難忍對方不斷講大話兼密密偷食，當她見到奧蘭度於奧斯卡前派對與女伴Erin McCabe的親熱照後更決心斬纜，奧蘭度現時埋里奧仔堆，似乎有心想做個風流萬人迷！
文：外娛組