鄭嘉穎陳凱琳互摸面珠預告生女
由鄭嘉穎、謝天華、閻奕格、胡琳、譚耀文、黎耀祥及鄭丹瑞主演的《風雲5D音樂劇》，前晚在紅館舉行最後一場。嘉穎女友陳凱琳（Grace）上演時空穿梭撐場，更做「孝順女友」孖住未來奶奶睇騷。謝幕一刻，嘉穎和Grace情深對望摸面珠，如入無人之境，Sweet到爆。
《風雲5D音樂劇》前晚來到尾場，飾演「步驚雲」的鄭嘉穎有女友Grace專程由加拿大返港撐場，已第三度捧場的Grace今次更攜同未來奶奶到場支持嘉穎。尾場亦吸引古巨基、周秀娜、郭藹明、敖嘉年、林子善、劉松仁、陳慧嫻、狄波拉和老公鬍鬚Kong等捧場。而唐詩詠更撇甩男友洪永城，與緋聞男友馬國明前來欣賞。
踢水「報仇」
至於嘉穎和飾演「聶風」的謝天華有場打鬥場面，坐在頭排的林子善竟向嘉穎做出打拳動作，搞到嘉穎被殺個措手不及忍不住笑。當嘉穎和天華在水池中揮劍對打時，就將池水踢去林子善方向「報仇」。不過，最溫馨還是在謝幕一刻，Grace專登坐到頭排唐詩詠身旁給嘉穎送花，嘉穎一手收花一手輕撫女友面龐，Grace同時摸嘉穎的面，兩人懶理全場觀眾，深情對望冧到暈。
禁天華囝囝埋身
音樂劇圓滿結束，嘉穎受訪時，稱會食餐好及好好休息；而天華則稱第二天便飛到匈牙利布達佩斯拍戲。嘉穎指天華因兒子尚小，故要努力搵錢供兒子上大學：「我未有嘛，有我先擔心未遲。」天華笑嘉穎喜歡女多點，嘉穎即笑道：「咁第日你個仔唔好嚟搞我個女嘞！」提到Grace看了三場兼陪未來奶奶嚟睇騷，兩人又互摸面珠晒恩愛，嘉穎即搭着男記者膊頭笑謂：「禮貌上啫。佢係好支持，多謝佢，今晚都好多老友嚟捧場，好似有馬國明、唐詩詠佢哋。（向林子善嗰邊踢水報仇？）佢突然間彈出嚟，嗰吓我真係忍唔到笑，係唔好意思嘅！但都多謝佢哋捧場。（踢水還畀子善？）諗住踢向天華，只不過方向斜咗少少啫，佢哋着晒雨褸唔怕啦。」
至於Grace前晚先現身紅館，但昨日就上載一張身在加拿大的相片，還寫着Jetlag，大家都被Grace的「時空轉移」搞到好混亂，但亦有心水清網民解畫指Grace早前到溫哥華玩，昨日的「新相」其實是早幾天前拍下的。
文：音樂組
攝：司徒國榮