鍾嘉欣婚後變TVBuddy吸金Easy

乜都唔憂 最驚屋企雪櫃壞

依家個個生一個起兩個止，話養一個細路至少都要使四百萬，但早排令網友食晒花生嘅東網節目《港‧故》專訪一對八十後父母月入三萬都照生三個，每個月仲有錢剩，有辦你睇，錢係睇你點使！更何況依家喺加拿大頻頻返嚟吸金嘅鍾嘉欣？如果佢唔係TVBuddy有後台，你估佢仲可以吸金吸得咁過癮？

所謂朝中有人好辦事，鍾嘉欣老公Jeremy係TVB前行政主席梁乃鵬嘅姪仔，雖然梁乃鵬已經退任，但冇影響力就假嘅！本來仲有合約嘅鍾嘉欣，就係因為自己人嘅關係，玩雙喜臨門結婚又生女？No problem！份合約咪照擺喺度囉，唔使雪藏唔使封殺唔使加辣招，天昏地暗咁拍劇都唔使，反而幫你不斷接job！品牌活動唔high唔接，鍾嘉欣每次返嚟扮到靚靚影吓相做吓訪問至少執廿萬，的確「easy執」！Jet lag眼瞓？留番上機先瞓啦！包埋佢來回坐businesso架，唔會瞓唔着啩？咁筍，吸金仲舒服過餵奶，發夢都識笑啦！最令鍾嘉欣顧慮嘅，就係確保屋企個雪櫃唔好壞。每次返港佢都會為個女儲糧泵定超過廿包人奶，有時仲擔心「斷糧」唔夠食，開完工即刻上機飛返加拿大。上次佢咪嬲豬囉，因為個雪櫃壞咗，三十幾包人奶咁就bye bye！又要開工又要湊女，仲可以收埋身，嘉欣話佢依家嘅體重，係比做女時重咗一磅咋！

今時今日唔恨做視后

享盡尊貴待遇、完全配合晒湊女schedule嘅鍾嘉欣，真係巴閉過未婚之前，唔怪得佢話從來冇諗過退出啦！相比起結婚前，捱到牙血都出埋，仲幾乎搞到有抑鬱症，代表作係有一大堆包括《溏心風暴》、《隨時候命》、《點解阿Sir係阿Sir》等等。一早已經升格為一線花旦，百分百係民選視后，更加係萬千宅男心目中嘅BB！就係因為嘉欣BB只係識得捱到金睛火眼，入行十幾年慳埋慳埋，慳咗幾層樓返嚟，夠乖夠聽話，唔識詐型爭上位，咪眼白白咁睇住個個輪住做視后，都未輪到佢囉！今時今日，視后呢個光環，只係令鍾嘉欣錦上添花，真係可有可無。

講到呢度，你會好自然咁話，如果A餐係視后，B餐係TVBuddy，識揀嘅梗係揀B餐！我Nuts哥話你知：乜餐都唔揀！識揀，梗係揀個好老公，尤其係一個有後台嘅老公！

Nuts哥