翁嘉穗大力仔舉重破紀錄

前港姐冠軍翁嘉穗與商人鄔友正婚後育有兩子，大仔Jason現年16歲，身材健碩的他已有五呎九吋高，前日Jason參加第60屆體育節的「香港健力錦標賽2017」，獲得青年組冠軍，並同時打破三項香港健力舉重（Powerlifting）紀錄，包括蹲舉、臥推舉及硬舉，其中蹲舉的舊紀錄是100kg，Jason創造的新紀錄是210kg，超越舊紀錄一倍有多，而他與同學組成的青年隊亦奪團體賽冠軍，認真犀利！

舉起210kg

前日翁嘉穗在社交網站分享喜悅，上載Jason的比賽片短，留言：「恭喜小兒Jason打破香港Powerlifting紀錄，成為210kg的紀錄保持者。」身在新加坡的翁嘉穗透露Jason開始健力舉重只有半年時間，今次是首度參加公開比賽，她又指其實教練在訓練Jason期間，已經知道他一定能破香港紀錄，Jason在健力舉重方面如此有天分，問翁嘉穗會否鼓勵兒子在這方面發展？她說：「睇佢個人意願，其實當初我都有少少擔心，唔清楚呢個運動嘅安全性，但見佢好有熱情，又有好多正規訓練，所以都OK，喺唔阻礙學業嘅情況下，都會鼓勵佢。」

翁嘉穗與鄔友正育有兩子，大仔Jason很有運動細胞。	Jason挑戰健力舉重，成功創造210kg新紀錄。	Jason與同學組隊奪團體賽冠軍。

出戰國際賽

至於如何栽培兒子成材，翁嘉穗謙稱在健力舉重運動方面，純粹是兒子的個人興趣，自己沒有特別栽培，但她在Jason小時候已經安排他學習各種運動培養運動興趣：「佢細個時我會畀佢學游水、打網球同詠春，佢跟葉問門下弟子學咗八年詠春，最初學運動當然為強身健體，後來佢就愈嚟愈鍾意運動。」除健力舉重外，Jason亦擅長游水、排球及網球，是運動健將，翁嘉穗說：「佢六歲已經游水游得好叻，入咗校隊，依家佢係學校排球隊隊長，有代表學校去外國參加國際賽，佢又有打網球，都去過泰國比賽。」翁嘉穗前日看完Jason比賽後便飛往新加坡，未能參與昨日的頒獎典禮見證囝囝獲獎，令她大感可惜。

文：名人組