李逸朗為風箏喊到眼腫

藝人李逸朗（Don）談起童年往事，最深刻就是讀小學一、二年班時，看到電視節目介紹日本一個風箏節，Don說：「個天有好多風箏好靚，嗰時開始我就好鍾意放風箏。」小時候住新界的他，家後面有座山，他每天都在山上跑來跑去，想在該處放風箏：「但嗰時屋企冇風箏，我年紀又細，阿嫲唔肯買畀我。有次我喺山度執咗個白色膠袋，喺屋企攞線綁住膠袋耳仔，成日覺得膠袋應該食風，但無論我將膠袋剪咩形，都冇成功放到。」直到有日阿嫲見他不斷將膠袋當風箏放，就為Don帶來人生第一份兼職工作，他說：「因為嗰陣阿嫲兼職摺金銀衣紙換零用，咁我陪佢一齊摺，之後佢買咗個風箏畀我，仲陪我上山放，但點都飛唔起，最後隻風箏仲畀樹勾爛咗。」Don因此喊到眼腫，返學校被老師問發生甚麼事，於是他將風箏事件和盤托出：「我老師好好，佢同咗我美術老師講，之後好快就有堂美術堂，教我哋用竹筷子做風箏，呢件事我記到依家，因為我覺得大家對我好好。」