黃智雯私心大推 百搭「爛牛」襯波鞋

平日喜歡運動的黃智雯，愛趁休息時間上跳舞課，她認為一條爛牛仔褲及白波鞋乃必需品：「本身鍾意着Casual Wear，爛牛仔褲係不二之選，因為上身襯咩都得，隆重又得，簡單又得。我鍾意跳舞，所以上身着Sporty啲就可以兩用。同埋以前跳舞先會着波鞋，但呢年唔知點解鍾意咗，仲買咗好幾對添，覺得幾百搭。呢季都係忙拍劇，有時出街都冇時間襯造型，所以爛牛仔褲加對波鞋，將會係我今年着得最多嘅造型！」而智雯坦言以往對飾物沒甚研究，家中也沒有太多飾物，但自從與「胡說八道會」姊妹們混熟後，每逢生日或節日也獲她們送上飾物，故才漸漸對這方面產生興趣：「我都係着重簡單款式，人哋未必會留意到，但我又覺得有啲飾物個Detail位可以點綴成個造型，太累贅嘅款式反而唔太好囉！」