關楚耀重遊灣仔 吃得到的地道情懷
關楚耀（Kelvin）近年演藝作品不多，但飲食事業愈做愈大，不但在台灣開設西餐廳及酒吧，甜品店今個月亦在新竹開張！原來Kelvin對煮食的濃厚興趣源自小時候居於灣仔，日前他重遊舊地，勾起不少對家鄉菜及鐵板餐的美好回憶。他還自爆小時候守龍門時右眼曾經受傷，幸得兒時玩伴「捱義氣」照顧，二人的友誼維繫至今，認真難得！
食波餅見證友情
灣仔太原街的行人絡繹不絕，其中一個原因就是有眾多玩具店，這條「玩具街」曾是Kelvin留下不少腳毛的地方，他說：「我鍾意買Lego同遊戲機，不過Lego好貴，可能等過完年或者考試成績好先買。有時由屋企人帶我嚟睇、一齊揀，又試過自己或者同阿妹一齊落嚟。」他喜愛玩以運動為主題的遊戲，像足球及運動會等，但男生總是喜歡親自參與：「以前喺屋企樓下，好多細路踢波、踩單車，都係我老竇啲朋友啲仔，老竇啲朋友又喺度打麻雀。」
Kelvin自言與鄰居的關係很好，一班小朋友聚在一起玩耍，就算後來分別到不同國家讀書，仍有保持聯絡，上年更舉家出席好友的婚宴：「最記得有次我守龍門畀個波省落右眼，爆晒微絲血管。嗰時又驚，唔敢畀爹哋、媽咪知，我朋友好有義氣，雖然當時大家得5、6歲，但佢都識得幫我安排同處理，叫佢父母帶我去醫院。當然臨尾都係畀我屋企人知，鬧咗一餐。」除了在樓下踢波，他有時也會跟爸爸到修頓球場，以前坐在觀眾席看爸爸踢波時總覺得觀眾席很宏偉，現在就覺得很親切。
拍戲巧遇舊街坊
走到一出世就開始住的聖佛蘭士街，剛巧路邊有一個足球，Kelvin立即「足球小將」上身，在街頭踢得不亦樂乎！問到可曾因踢波而打爛物件？他說：「又冇嘅，不過有時啲Auntie、Uncle會追住我哋話食飯啦，或者喺樓上嗌落嚟，依家香港好少有咁嘅情懷。」有次重回這區拍電影，他更巧遇昔日街坊：「拍拍吓撞到我老竇啲好朋友，估唔到仲住緊喺度，我都估唔到自己會返嚟拍戲。但之前唔係呢啲舖頭，係裝修舖，依家靚晒、變晒啦。」
最愛嫲嫲家鄉菜
他回想當時一家人非常熱鬧，每天都有好餸吃：「我同爹哋、媽咪、嫲嫲、舅公、舅婆一齊住，好多人。仲記得嫲嫲啲撚手小菜，譬如炒酸豆角加肉碎咁，佢係桂林人，所以有啲辣。」Kelvin最喜愛簡單而有心思的家鄉菜「豆腐卜釀豬肉」，嫲嫲把食譜代代相傳，上兩年他主持烹飪節目《關人煮事》時也有示範這條秘方。在祖屋住了近5年後，他跟父母搬去鰂魚涌，但到十多歲時又搬回灣仔，始終忘不了這區的好：「爸爸好鍾意呢區，因為佢細個都喺呢頭住，佢又鍾意食嘢。最記得大佛口大牌檔，飲奶茶、食奶醬多，不過依家冇咗囉。」受到爸爸影響，身為扒房老闆的Kelvin並沒忘記地道美食。
煮完飽咗唔想食
還好童年經常光顧的西餐廳仍然營業，他形容是自己的「開心餐廳」：「以前每次考試成績好，或者有啲特別高興嘅日子，好似生日咁都會去食，所以呢間餐廳對我嘅回憶就係高興、開心。一去食鐵板餐就勁興奮，個蘋果撻係最正嘅，由細到大都鍾意食。」這些美好的經歷成為他現在經營餐廳的理念，鐵板餐及甜品均是不可缺少的一環，但他笑言不太享受自己的飯自己做：「自己煮飯、整甜品都試過，不過通常煮完都飽晒，冇咩胃口食，但係見到朋友同屋企人食得開心，分享嗰種感覺又唔同。」
文：音樂組