「大胃」凌凌柒溝女眼高手低 鄭俊弘偷食唔抹嘴攞嚟衰

畀人翻舊帳逐樣數

愛情嘅嘢，從來冇話對與錯，男未娶女未嫁，一日未結婚，都可以有權選擇，衰在Fred識溝唔識做，唔識得好好去處理。想換畫，唔該都花下工夫去擺平吖，成日貪方便食咗先算，唔諗吓有咩後着應付，梗係自然引爆，激到正印嚟一招玉石俱焚爆大鑊，外遊坐頭等冇畀番錢又講，隻求婚戒指值幾千蚊又數！Fred話過往為保護未婚妻而低調，轉頭就拖實何雁詩認愛，初時仲吹水話因為驚對方跣親而拖實，你跣我就真啦！話晒前度跟咗你三年，啖氣點吞得落，實行盡爆心中情，等你乖仔變衰仔囉！

睇往績，Fred嘅情史同緋聞真係水蛇春咁長，阿Fred變阿「Flirt」，成日都係定力唔夠衰「為食」，好似玩接龍咁女友一個接一個！想做愛情「大胃王」，都要高招先至食得招積，住得舒適！阿「Flirt」簡直係失敗嘅偷食個案，識食又唔識執手尾，留低大籮證據，眼高手低！想做「大胃」密探凌凌柒，食得安全又小心，好心得閒睇吓鐵金剛占士邦007惡補吓啦！占士邦食女無數，你估淨係講句：「My name is Bond」就掂咩？佢大把貨咪一樣要玩花臣氹女，當條條女係Only One唔在講，最緊要杯事前Dry Martini，慢條斯理咁調吓情，唔係為搞嘢而搞嘢，每次都要做到True Love。西洋技術你學唔到，咪學吓淨係靠把口都有七個老婆嘅韋小寶囉！

掩飾都懶真失敗

所謂偷食行遠啲，相反Fred行多幾步都懶，去何雁詩大埔香閨都算，衰在嘈到鄰居都頂唔順投訴，失敗！完事再Call Uber返屋企攬住未婚妻瞓到大天光，以為咁就冇事？Uber張單一出，有名有姓幾點去邊，冇得抵賴，失敗之中嘅失敗！就連手機個Phone List，都寫明係何雁詩個名，打出打入紀錄全部都係佢個名。大佬！畀着我係Fred個未婚妻火都嚟啦！小小蠱惑嘢都唔願做，擺到明話我知你去偷食啫，畀番小小薄面都好啩？Phone List將「何雁詩」改做唱片老闆「何哲圖」又或者索性改做「何韻詩」，有咩事上嚟，真係可以畀你攣都拗番直啦！Uber等於打卡，香港咁多的士，打上的士台都會叫到車啩！

話時話，好多人都話Fred今次一鋪清袋，錢途危危乎，當然如果佢深明「早認早享受」嘅道理，早啲認唔好驚青收埋，唔會畀人媽到去秀茂坪啦！愛一個上一課，今次Fred應該都學精咗，近排有話一身蟻嘅佢，七月紅館個唱分分鐘嗌停，所謂有危就有機，若然騷照開，邊度跌低就邊度起番身，順勢搵埋Uber贊助，有得諗喎！又或者為佢同何雁詩度身訂造拍番齣《我瞞拍拖了》，都應該有收視啩！

Nuts哥