曾志偉 金燕玲奪男女配齊齊多謝個女！
曾志偉及金燕玲憑《一念無明》奪得「最佳男、女配角」，志偉繼1997年《甜蜜蜜》後再獲此獎，在春夏手上領獎後說：「好緊張！對手太勁，上次攞係新導演陳可辛，今次又係新導演黃進，大家留意佢！我要多謝余文樂，冇諗過佢演得咁好同埋唔同我傾偈！多謝我個女話：『爸爸你拍喜劇唔知講乜，可唔可以拍啲有深度嘅戲？』」
激動起雙飛
今次第四度奪得金像獎最佳女配角的金燕玲，在余文樂及楊千嬅手上領獎後，激動說：「同一個角色能夠攞到金像獎同金馬獎係我嘅心願，多謝導演同編劇，你哋同我個女咁上下年紀，送咁大份禮畀我，好感謝評審，唔好理角色有幾多戲，都要好好做，一定有人睇到！多謝我個女，佢好乖，多謝錫我嘅朋友，你哋支持金燕玲，唔係因為金燕玲係邊個，係因為係我！」知己蘇施黃在社交網站即時送上祝賀！
至於「最佳新演員」由《點五步》胡子彤奪得，他否認與女友歐鎧淳情變：「係佢叫我唔好喺台上多謝佢，佢會怕醜！」
此外，志偉入場前被問到有否關心好友成龍？他說：「乜事？（吳卓林報警拉阿媽吳綺莉！）吓？報警拉成龍？（拉阿媽！）真係唔知喎，我啱啱歐洲返！不過家庭事，私了啦！（成龍同你呻？）冇。」
