「火雞姐」拳拳到肉打出一片天
網紅「火雞姐」丁可欣（Yanki）除跳舞了得外，原來亦是泰拳助教，日前她到拳館與師傅對打，出拳時眼神兇狠，更向師傅使出箍頸絕技，十分厲害！身為DSE過來人的她，望藉打拳鼓勵考生不要太大壓力，盡了力就可以，因為過程總比結果重要！
「火雞姐」丁可欣（Yanki）身為狄易達師妹，除跳舞厲害外，身材纖瘦、看似弱質纖纖但其實是打拳高手。日前她來到大埔拳館練習，見她熟練地綁上手帶，與師傅阿柴（Charcoal）對打。兩人從出拳、勾拳、踢腳等練起，打到拳套啪啪聲。其後正式「嚟料」，Yanki使出箍頸絕技，成功將師傅撻落地，實力有番咁上下！打完拳後Yanki繼續操體能，見她成功hold住引體上升12秒，但她直言未夠好，望練到一分鐘為止。
訓練意志考教練牌
有跳舞底的Yanki，自爆一年多前剛開始打拳時，師傅笑她打到像跳舞，一企不穩轉個圈就企番穩。現時身為助教的她，早前曾嘗試考教練牌，指打拳可以挑戰自己及訓練意志：「未打拳前我意志冇咁好，打拳有好多體能訓練或動作都係挑戰極限，嗰刻如果你放棄就真係放棄，所以係好好訓練意志嘅機會。打拳唔只用身體，個腦都會同自己溝通對話，叫自己唔好放棄，意志好重要。」
提到現時正值考DSE的日子，23歲的Yanki望藉打拳勉勵考生：「考試冇輸贏，無論打拳定考試，最重要都係過程。練拳時你會有所得着，同樣考試都會付出好多努力，而呢啲過程係比結果重要。」
多方發展搵興趣
她表示讀書時會做運動減壓，亦坦言自己讀書興趣不太：「如果對讀書冇興趣，最緊要自己有個方向，例如我會跳舞。考試係重要，但唔需要壓力大到尋死，希望佢哋好好愛錫自己。」她亦謂考試只佔人生其中一部分：「我DSE成績唔好，但我依家都冇死，仲為自己興趣努力緊，甚至覺得過得好有意義，所以希望各位同學努力，盡咗力就可以，冇人會責怪你，唔好咁大壓力。」
文：音樂組
攝：鄭家俊
場地：ATMA Fitness Center