關之琳避談前夫同舊愛馬清偉有偈傾
「大美人」關之琳（之之）出席品牌活動，罕有獲舊愛馬清偉現身撐場，她指二人一直保持好朋友關係，卻對台灣富商前夫陳泰銘有所保留。同場的鍾嘉欣活動後隨即與女兒返回加拿大慶生，暗示老公有驚喜給她。
昨晚MOISELLE舉行2017春夏系列時裝騷，同場發布與關之琳合作的「Rosamund MOISELLE 2017 春夏系列」，不少圈中人應邀出席，包括鍾嘉欣、關心妍及樂基兒等。之之壓軸現身時裝騷，穿上全新服飾的她心情大好，獲舊愛名人馬清偉與現任女友Winnie撐場，三人還一起合照。事後之之說：「佢上一季都有嚟，我哋係好朋友，同佢女朋友都係好朋友。（係咪同舊愛都可以做番朋友？）盡量啦！（咁前夫呢？）遲啲先算！（佢有冇想搵番你？）遲啲再講！」明顯有所保留，但她指前夫有朋友做代表前來捧場。
冇心動劇本
早前之之透露在看劇本，問到可有心動？她說：「唔啱呀，過唔到自己嗰關，始終休息咗咁耐，除非真係有啲令我毛管戙嘅劇本。（你好朋友金燕玲都成日挑戰角色？）我都好替佢開心，佢拍好多戲都有提名同攞獎，咁佢本身做得好，有時我都會諗，佢個角色我做得唔得呢？」
而鍾嘉欣就以低胸裙現身，表示活動後便趕返加拿大慶祝4月9日生日，問到老公可有表示？她笑說：「我估佢有，因為佢不斷問我攞中學同學聯絡，我估佢會搞Party，佢唔知我知，但我都唔肯定，陣間唔係咪好(火羅)？今年第一年同埋個女過生日，好開心！」至於歌手關心妍稱還在努力收身，又笑指囡囡是大力妹，問到收身成果？她說：「仲有六磅，呢啲肥唔同嗰陣演唱會減肥。」
文：名人組