林敏驄笑黎瑞恩大媽

創作人林敏驄將於6月9及10日假紅館舉行《今天星閃閃35年時日如飛林敏驄腦交戰作品展演唱會》，昨日他為演出舉行記者會，獲譚詠麟、鍾鎮濤、李克勤、張衞健、鄭伊健及草蜢等拍片支持，而有份主辦及投資的林建名及黎瑞恩（小恩子）亦有現身撐場。林敏驄獲兩位穿泳裝的外籍女郎陪同出場，他笑說：「佢哋係法師嚟，幫林建名開光嘅！」談到這次開作品展的原因，他笑言因小恩子很欣賞他：「嗰日同小恩子打完波後去唱歌，畀佢發現我好有才華。」更笑指小恩子是「大媽」：「佢係我阿媽，佢投資好大份，依家係大媽！」

城城度期做嘉賓

對於一眾歌手朋友拍片支持，他表示非常感動，亦感激他們爽快答應做嘉賓：「估唔到平時我得罪人多，但有咁多真正朋友，嘉賓唔只拍片嗰啲，仲有好多，有啲可能最近唔喺香港，例如陳慧嫻同古巨基。有打畀小美同郭富城度期，佢6月好似喺加拿大拍戲，會再度。」

唔怕關淑怡失場

問到可有邀關淑怡做嘉賓？他說：「有，佢答應咗，揀咗好多歌。佢好positive，我哋會私訊，唔擔心佢因情緒起伏而失場。（有傳關淑怡財困？）呢啲曾志偉搞掂啦，贏咁多錢。」

林敏驄坦言今次為度rundown而頭痛，但認為是樂趣，又指屆時會上台獻唱。另外，他早前曾與落選港姐阮嘉敏傳緋聞，問到「女友」可會到場支持？他否認有女友：「冇呀。（你唔畀佢？）冇呢件事。（朋友？）好多好朋友。（到時幫手換衫？）好多人幫手。」

文、攝：音樂組