小齊睇好樂仔家棟緊張腦缺氧

入行30年的林家棟憑《樹大招風》，先後獲「香港電影評論學會」及「香港電影導演會」頒發影帝予以肯定，於即將舉行的金像獎似「稍勝一籌」，獲外界一致看好的家棟卻有另一種看法：「我仲未睇晒其他人嘅演出，好難下判斷，不過我同小齊今次嘅戲路就畀到新鮮感觀眾囉！起碼入行咁多年，我未試過演咁內斂及沉鬱嘅角色。」

回想當初「主帥」杜琪峯來電，表示「冇乜錢」去開拍《樹》片，家棟「哦」了一聲便答應演出。原來他一直視杜Sir為偶像，更自爆心結：「好記得第一次拍杜先生嘅戲，係朋友引薦嘅，點知佢根本唔知我係邊個，好唔開心囉！」

任賢齊於戲中演活賊王，竟笑言是本色演出。	梁家輝	余文樂被任賢齊大讚演技成熟。

與任賢齊及陳小春「領銜主演」，然而3個最終只得2個獲金像影帝提名，家棟直言帶點「遺憾」，期待金像獎當晚大家可以「團聚」，又謂：「坦白講，依家心情唔緊張，但諗起當晚坐喺台下兩個鐘就等最後一刻，可以幻想到有幾折騰，分分鐘腦缺氧！」

做壞人係本色演出

與家棟「拍住上」入圍的任賢齊，謙稱「個個對手都好勁，個個都係強敵」，談到余文樂更直言：「佢演情緒病患者演得好用心，係新一代演員中比較成熟嘅。」至於杜琪峯曾表示希望小齊與家棟成「雙影帝」，首次入圍角逐金像影帝的小齊笑言：「冇諗過，冇所謂，邊個攞我哋都開心。」

一向給人「大好人」感覺的小齊，今次成功演活賊王，他卻自爆求學時其實是惡人一族：「放學去踢波個個都兇神惡煞，要用氣勢壓過對方嘛，習慣黑口黑面。入行後大家話我演好人演得好，咁我演技真係幾好。（好有親和力？）咁我做戲做出嚟啫。（演壞人？）呢個就係本色演出喇。」

「最佳電影」競爭激烈

另外，本屆入圍角逐「最佳電影」的幾部作品中，早前於多個影展及頒獎禮「先聲奪人」、由曾國祥執導的《七月與安生》被睇高一線，然而集合一眾影帝級人馬演出的《寒戰2》，以及上映時內地勁收33.9億票房、周星馳執導的《美人魚》，實力同樣不容忽視，將與小齊及家棟主演的《樹大招風》爭獎。各獎項最終花落誰家，星期日晚自有分曉！

文：影視組

場地：銅鑼灣柏寧酒店

林家棟服裝：CLUB MONACO

林家棟化妝：Isaac Poon @ J.A.C.K Timeless

林家棟髮型：Alex Chan @ projetz4 / J.A.C.K Timeless

任賢齊服裝：Bauhaus