「雁鄭戀」冇得再呃拖手認愛

鄭俊弘（Fred）與何雁詩（Stephanie/簡稱Step）被本報踢爆秘密撻着，但事情峰迴路轉，他日前被爆原來一腳踏兩船，早有一名拍拖三年的富貴未婚妻Beebs，令Step背負小三之名。「偷食」一事曝光後，Fred前晚接受無綫娛樂新聞台訪問交代，指雖曾向Beebs求婚但未得對方接受，並否認一腳踏兩船，更澄清分手跟Step無關。不過，Fred當時未有承認跟Step拍拖，聲稱只是好友關係。直至昨日，兩人拖手睇村屋的照片曝光，原本不認愛的Fred終於要站起來認愛，昨日還親自到機場送女友Step到橫店為無綫新劇《天命》開工。Step事後受訪時承認主動要求Fred送機，因知道機場有不少記者等候而有點驚，希望對方可陪伴面對，逆境中得到扶持，坦言對Fred的行動引以為榮。

否認做小三：我知有幾痛

昨晚6時多，Step與Fred手拖手現身機場，正式公開認愛，並按要求大方影合照，期間Step甜笑Sweet到爆，不時含情脈脈望實男友。Ferd受訪時強調Step不知道他與未婚妻的感情事：「近日發生嘅事連我屋企人都好擔心，所以我要出嚟回應。我同阿Step一路係好好嘅朋友、關係，無論係音樂、人生上嘅觀點都好相似，我同佢都經歷過感情上唔開心嘅事，我哋有一齊支持大家！我一直都對感情好低調，所以之前段感情係冇人知，甚至阿Step都唔知！不過嗰段感情已經終結咗，唔提係因為想保護同尊重對方。」

「雁鄭戀」終於公開，兩人大方講感受。	何雁詩拖都唔夠，仲要掹住鄭俊弘件衫，鬼咁癡纏。	何雁詩笑住入閘，但鄭俊弘離開時就唔多開心。

問到拖手是否公開認愛？Fred說：「我知呢方面處理得唔好，所以想多謝阿Step呢段時間嘅支持、愛護同信任。（認講大話？）我哋呢段感情係啱啱開始，想珍惜同保護，所以選擇唔公開。（拍拖幾耐？）因為尋晚一個報道，我要出嚟同大家澄清，我一定要保護阿Step，一定要去承認呢件事。」提到拖手睇村屋，Step承認有此事：「畀多少少支持我哋，特別係畀多少少支持鄭俊弘，因為佢好辛苦、好大壓力，希望我唔喺香港時大家幫手睇住佢！（開始拍拖時有否與男方上段感情重疊？）唔會！我都係女人，知道第三者有幾痛，所以唔會做！（老闆何哲圖知拍拖？）佢都係今日先知。（老闆都呃！）我哋收得好埋，其實大話精呢樣嘢，我哋承認呢幾日講咗誤導大家嘅嘢，去保護呢段關係，以為咁係最好，今日企出嚟澄清都係勇敢嘅一步。」

主動翹男友 晒愛的宣言

受訪後，兩人並肩步向離境禁區，期間被要求拖手，但Step表示「好怕醜」，最終仍主動翹實Ferd，同行期間再度十指緊扣拖手。去到禁區附近，Step突然問「喺邊度呀？」，被笑指眼中只有男友！當記者叫兩人Goodbye Kiss，兩人只尷尬傻笑，最後女方帶住行李入禁區，分開前再度轉頭望向男友。入閘後，Step更新社交網並留下愛的宣言：「我一向對感情認真……不會在知情內成為第三者。今天遇到一個我很喜歡的人，因為他和我一樣，而我愛我自己，希望事情可以告一段落……我可能無知，但我光明正大。」

文：影視組