嘉穎舞功輸畀天華陳凱琳上門呵番
鄭嘉穎與謝天華主演的《風雲5D音樂劇》尚有兩日就正式開鑼，忙於排練的嘉穎昨日獲女友陳凱琳人肉速遞到住所蜜會！而演得又唱得的嘉穎坦言這次演出被跳舞考起，更大呻練了十個鐘亦不及只練了十分鐘的天華跳得好！
《風雲5D音樂劇》後日（6號）將於紅館正式公演，鄭嘉穎、謝天華、黎耀祥、譚耀文等演員近日忙於作最後排練，而昨午十二時許，嘉穎的女友陳凱琳被發現現身嘉穎住所樓下的小巴站，戴着口罩和Cap帽的她似乎剛去完嘉穎住所，想爭取時間與對方見面。
六舊腹肌出番嚟
音樂劇公演在即，飾演「步驚雲」的嘉穎在昨日播出的電台訪問中，坦言現時心情緊張：「個心就嚟跳出嚟，小弟唔似天華咁有舞台經驗，我本來想做咗舞台劇先，再挑戰更高難度，點知一嚟就有咁嘅機會，我覺得音樂劇係最高難度o架喇。」又笑謂最難是要跳舞：「我做歌手嗰時都唔跳舞o架啦，要擺最多時間落去，真係好唔忿氣o架，我排十粒鐘，天華就排十分鐘，佢仲要有時跳得好過我！但佢真係本身有個底，我惟有將勤補拙。」嘉穎最近亦為角色努力操肌，他笑言全靠這次演出，令他的六舊腹肌再次「歸位」：「好耐冇見嗰六師兄弟，依家又返番嚟！」他坦言推了不少工作來參演音樂劇，但覺得相當值得：「一生人點都要做一次音樂劇嘅，有咁嘅機會唔可以放過，所以絕對值得！」
吊威吔拉近距離
而飾演「聶風」的天華就表示劇中最大的挑戰是留長頭髮：「我本身Keep咗好多年短頭髮，又未試過咁長頭髮放喺頭上面，有時啲風一吹過嚟就會亂晒，呢樣要適應。」天華其中一場戲要與飾演「孔慈」的閻奕格吊威吔，雖然有輕微畏高的他事前曾表示好驚，但試過後亦大讚效果好：「都幾靚同幾震撼，同台下觀眾嘅距離都幾近。」
文：音樂組