陳嘉寶11月嫁滑水「財子」
陳嘉寶近年因拍無綫劇而人氣急升，雖然已有男友黃頌祈，但無損其在網友心目中的女神地位！雖然一直有傳她好事近，她更曾自爆男友求婚過百次，不過一直未見婚期，但原來她已答允婚事，將於十一月中拉埋天窗！日前兩人甜蜜蜜到街市買餸返回男友寓所，預演甜蜜結婚生活！
今年27歲的陳嘉寶（Anjaylia）與年長她八年的35歲富貴男友黃頌祈（Epaphras）拍拖四年，感情如膠似漆，早年Anjaylia在無綫劇《女人俱樂部》中飾演李若彤少女版而人氣急升，之後拍《殭》時亦大受讚賞，更被封為人氣女神之一。由於Anjaylia與男友均是虔誠基督徒，故拍拖多年就算女方在男友家過夜都保持「有愛冇性」的關係，令Anjaylia被封為「處女黨」新成員，相當矜貴！
低調籌備婚禮
不過，近年Anjaylia男友Epaphras相當「進擊」，已經向女友求婚過百次，兩人更不時被拍得甜蜜睇傢俬及曾經用手機睇裙褂款，看來好事近，但Anjaylia卻從未有透露幾時嫁人，只稱不排除會閃婚。據知她原來已答允男友的婚事，並將婚期定於十一月中，兩人最近不時忙於籌備婚禮，但礙於他們想低調處理婚事，所以對婚期一直三緘其口！
雖然忙於搞婚事，但有時都要鬆一鬆，日前兩人被拍得坐七人車到筲箕灣街市買餸煮飯仔，甜蜜滿瀉，在街市大部分時間都手拖手，十足十糖黐豆一樣，買醬料時，一個揀一個畀錢，之後Anjaylia有電話短訊要覆，男友則乖乖站在Anjaylia身邊等候，而一向性格活潑的Anjaylia睇電話都表情多多，一時向男友甜笑，一時又望着電話扁嘴，相當可愛，難怪男友錫到燶！
煙韌買餸閃爆街市
當Anjaylia撳完電話後，兩人繼續翹手在街市放閃，睇海鮮時，兩人又邊揀邊說笑，彷彿成個街市得番兩個人一樣，閃到爆炸！買完餸後，兩人離開時碰巧下起雨來，因兩人沒有帶傘，Anjaylia只好用環保袋遮頭，之後上番七人車座駕返回男友位於炮台山過千萬寓所，齊齊玩煮飯仔。
Epaphras四年前在教會認識Anjaylia，之後展開追求並成功奪芳心，兩人拍拖期間不時周圍去，又會影一些很趣怪的情侶相，十分煙韌！不過，兩人拍拖四年並非無風無浪，Anjaylia曾經獲才子模特兒兼Blogger林皓霆追求，Anjaylia最終不為所動，與男友情比金堅，更將於今年年尾拉埋天窗！
文：影視組
攝：追蹤組