容易被飛的女人！胡定欣爽型絕頂得住

瞓醒覺就Game over

唔想拖胡定欣落水嘅陳展鵬，惟有親手「熄機」毀滅童話，宣布「冇追過冇拖過冇戀過胡定欣！」立場鮮明，唔單止齣戲真係夠鐘散場，最重要係胡定欣被飛慣！胡定欣從來唔係玉女，而係烈女，一直以來都係容易被飛的女人，皆因性格如刁蘭硬淨，拎得起放得低，零拖泥帶水，冇手尾跟！每次Game over，佢都話撇就撇，執袋起身，夠爽夠型，簡直係甩拖易，男人要同佢甩拖真係好Easy！你見佢每段感情都唔會爛尾爆大鑊，好嚟好去就知啦！大佬，一個男人要講分手，都要睇女方咩料o架，容乜易一哭二鬧三上吊？

一夜之間激起陳胡兩派粉絲嘅民憤，啱啱瞓醒都唔知發生乜事嘅胡定欣，擘大眼就見到陳展鵬同單文柔乾柴烈火，自己就無啦啦「被分手」成頭問號，諗住都係時候散場，唔想講多錯多，咪只答話大家一直係同事囉！點知兩幫粉絲不停互片，球亂射，龍門亂搬，鬧胡定欣劃清界線兼唔送祝福，陳展鵬仲慘，硬食「劈腿」呢隻死貓，不過話晒做過亞視，幾惡啃都頂得住！

相比以前嘅「被飛」往績，今次對胡定欣嚟講簡直濕濕碎兼畀晒面，完全頂得住！想當日拍拖兩年嘅吳浩康見異思遷，轉嗒莊思敏，胡定欣條氣已經唔順，點知莊思敏聲淚俱下，聲稱畀人鬧：「你都係着我舊鞋咋！八婆！」嗱！烈女不怕死，怕死嘅只會係八婆，胡定欣真係怕你有牙，咪聲大大話有人老作博見報囉！有冇講過都好，大家已經入晒腦，覺得此女子型到裂，非同小可，就算有講過又點？喺情敵面前夠膽理直氣壯，型！呢鋪胡定欣加晒分！之後佢同馬國明分手，三姑六婆又走出嚟，話馬國明係筍盤喎，分得手即係胡定欣係港女啦！胡定欣天不怕地不怕，八婆點會怕？一於出刁蘭本色神回：「吳浩康形象差，就話我好；馬國明係筍盤，我就一定係次貨o架？」又啱數喎！

男人渴求英雄感

相信最令胡定欣O嘴汗顏，莫過於N年前被冠名為「姣精」！如果佢容許自己姣，一早姣出個未來，使乜捱到依家？太爺嗰代就開始佔領西環經營海味舖，你(口趙)緊山楂餅時，呢位「海味千金」已經瑤柱當零食，可惜家道中落，父母改行做司機同會計。佢明知世界艱難都甘願貼地實幹，可能係自細食盡鮑參翅肚，花膠湯當水飲，個底打得零舍好，佢入行15年嚟請嘅病假唔超過5次，咬實牙關默默耕耘，星途雖然比人走得慢，但理想始終達到。

胡定欣唔係絕色美人，但有一份橫眉英雌氣概，天跌落嚟當被冚，歷盡風雨，練成淡定與從容，活脫脫係女漢子刁蘭！35歲嘅佢硬朗灑脫如刁蘭，即使贏得千萬人崇拜，但相信佢最想崇拜嘅，係一個不再讓你孤單嘅依靠，經歷咁多段感情，雖然佢一口咬定愛得未曾後悔，但睇怕都要開始學識由女漢子變為小女人，先搵到有情人。只怪無論係大男人抑或小男人，心底都總有一份英雄感，想喺另一半面前伸出強而有力嘅臂彎。男人點都想Man，畀着你係陳展鵬，你覺得企喺胡定欣還是單文柔身邊Man啲？

Nuts哥