張名雅誕7磅B仔痛到嘔

前港姐張名雅日前順利誕下麟兒,兒子Mario出世時重約7磅!她昨日受訪時坦言陣痛過程痛到連嘔兩次,幸好BB很快便出世。初為人母的她雖享受餵人奶的溫馨過程,但坦言確實有難度:「自己用力泵黃金初乳,點知整損咗,真係埋唔埋身食都痛!」

娛樂圈近日喜事重重,特別旺生BB!繼蘇永康與謝安琪後,現年29歲的前港姐冠軍張名雅亦正式做媽咪,一索得男!恭喜恭喜!去年9月初,張名雅與律師老公蔡錦豪(Joe)共諧連理,同年11月於社交網宣布有喜,本來預產期原定4月底,但BB似乎勁心急,近日提早出世!兩人早為兒子改英文名Mario,出世約七磅重,頭髮很多、輪廓又深,還擁有一雙大耳朵,相信將來必定聽教聽話。她透露醫生最初估兒子只有5磅多重,幸好最後都變番大隻仔!

出世幾日識得笑

張名雅早前下決心要經歷「女人最痛」,選擇自然分娩,回憶「10級痛」的生仔過程,她不禁抹一把汗:「其實我佗BB時從來冇嘔過,但喺醫院陣痛期間,我嘔咗兩次,係痛到嘔!陣痛嗰時真係好痛好痛,嗰種痛係無法形容。」她又指好彩有老公在旁打氣及替BB剪臍帶,整個生產過程相當順利:「我度數都開得好快,準備生嗰陣其實好想喊,但我一直死忍,好驚一喊就唔夠力生,之後用力咗三、四次就生咗!BB出世第一聲喊嗰陣,我同老公都忍唔住一齊喊,當時真係好感動!BB出世幾日就識得笑,可能平時我沖涼時同佢講乖啲、要多啲笑,BB依家真係成日都笑得好開心!」問到BB似誰?她說:「我覺得兩個都似,但佢個樣真係變得好快。」

忍痛餵黃金初乳

由於自然分娩,張名雅身體復原得很快,又指現時有陪月照顧及煲湯補身,BB亦很乖,但說到餵人奶就坦言頭痛:「餵人奶過程都好辛苦,黃金初乳好珍貴(0架)嘛!我咪起勢咁泵,點知整損咗,真係埋身食又痛,唔埋身食又痛,不過埋身餵嘅感覺真係好窩心,佢一路食一路瞓,感覺好舒服咁!」

何傲兒與陳庭欣昨日收到喜訊後已分別恭喜好姊妹,何傲兒說:「恭喜佢呀!做媽媽真係好偉大,最近身邊都好多朋友生BB,我一陣都會去醫院探一個小生命嘅誕生。本來都想去醫院探名雅同Mario,可惜夾唔到時間,要遲啲去佢屋企探佢!」陳庭欣則讚BB十分可愛,被問到似誰時笑說:「我睇相係見到BB側面,睇唔出似爸爸定媽媽!不過真係好可愛,第時我負責教佢做主持!」又透露已密密在網上搜尋可愛衫仔送給BB。

文:影視組

第一手消息請下載on.cc東網iPhone/iPad/Android