鄭俊弘攀石甩手李佳芯險被壓扁

鄭俊弘、李佳芯、黃心穎及湯洛雯等，昨日在觀塘一個攀石場宣傳無綫劇《與諜同謀》，Fred攀石時失手險些壓倒李佳芯，事後即拍心口定驚，受訪時又笑言幸好「收得切掣」，有驚無險！李佳芯接受電話訪問時稱當時太投入遊戲唔識驚，反而擔心Fred為了避開她而受傷，並讚Fred身手敏捷。

心穎苦無舞伴

同場的黃心穎被問到是否經常做運動，她表示因忙於拍劇，運動時間較少，而自己過往喜歡跳舞，目前卻苦無舞伴陪練舞，問到為何不邀請緋聞男友馬國明練舞？她笑說：「佢跳舞應該唔在行。（佢叻咩？）踢波囉！其實我小學都有踢波，但媽咪驚我腳粗阻止我繼續學。（如果馬國明邀請你去睇佢踢波？）睇吓有冇時間，唔抗拒。」記者建議她屆時穿短裙化身啦啦隊打氣，她即自認男仔頭：「我唔係咁女仔o架！我在場應該會食花生，飲啤酒！」

心穎擘髀做一字馬，毫無難度可言！	心穎（左）同湯洛雯合照時張開雙手，莫非扮緊獎門人？	鄭俊弘攀石時跣手，李佳芯差啲變柿餅！

湯洛雯皮膚發炎

至於湯洛雯近日備受發燒及皮膚炎困擾，透露因用錯護膚品導致皮膚發炎：「前幾日發燒，又唔好彩用錯有激素嘅護膚品，見到報紙報道即刻停用，之後皮膚發炎。睇咗西醫同中醫，依家勉強化到妝。」問到被封「宅男女神」，現時在網上晒相是否要先行修圖？近看臉上有不少粒粒的阿湯說：「唔使，影相唔覺嘅。我之前上唔到妝，希望慢慢調理番。」談到在《與諜同謀》穿一字膊服裝示人，獲網友盛讚，她笑言為穿靚衫，事前減了十多磅。

文：影視組