蘇永康B仔封爵識聽老竇唱歌

快將50歲的蘇永康（阿公）日前老來得子，太太馮翠珊剖腹誕下囝囝，昨日「蘇蝦」靚樣曝光，見阿公一臉慈父抱住樣貌趣致的囝囝。他透露B仔是在周一（20號）出世，重6.11磅，他感謝好友帶同禮物探望，並謂心情沒有很激動，但笑說：「成家人最開心係我阿媽，嚴格嚟講由星期一開始未見過阿媽隻眼，佢笑到見牙唔見眼。」

BB腳出先要拖出嚟

講到B仔似阿公還是似媽咪，他笑說：「似我，就當然出現少少問題啦！但好難講，長大十幾年之後，可能似我先係靚仔呢。（BB改咩名？）我阿媽話，你爸爸玩爵士音樂，點解唔叫Jazz？」又笑言好友陳奕迅叫B仔做「蘇爵士」。他透露當日黃昏陪太太入產房，期間舉機不停拍，又自爆：「BB右腳出先，醫生要拖佢出嚟，開頭一、兩分鐘出咗嚟冇咩聲，醫生叫我抱佢，我咪坐喺度唱歌畀佢聽，同佢按摩，佢可能喺肚入面聽慣咗我把聲，一聽我把聲佢就開始面色紅潤，血氣開始運行。依家都係，佢肚餓喊一聽我把聲，我過去抱佢就唔喊，食飽就瞓。」

「老竇！你個口笑到合唔埋喎！」（設計對白） 蘇永康抱着囝囝，有子萬事足，而囝囝頭上有一道半圓形深痕。

「老竇唱歌好好聽呀！」（設計對白）

延遲退休做多廿年

阿公透露親手幫BB剪臍帶，笑言似拍《妙手仁心》：「我仲一隻手攞電話 ，一隻手攞鉸剪，護士話好多爸爸要剪兩次先剪到，但我一刀剪落去就搞掂。」他謂今次是一世難忘的經歷，但不會再有第二次，因沒想過生第二個：「本來諗住做多五年就歎住過人生，半退休過日子，但依家佢出咗嚟，我要延遲退休計劃，起碼做多廿年啦！」首次榮升人父的他謂只希望囝囝聽教聽話及健康快樂。

婦產科專科醫生余啟文指嬰兒出生時腳先出，情況不普遍：「大概喺100個嬰兒中，3至4個先有咁嘅情況。腳先出嘅嬰兒需要多啲時間出生，有機會增加短暫缺氧嘅風險。」至於阿公兒子頭上有一道半圓形深痕，余啟文稱醫生借用產鉗夾着嬰兒的臉部助產時，可能因而留下疤痕，但疤痕會短時間內愈合。

文：音樂組