麥子豪無悔「收山」小白臉變真漢子

前英皇跳唱組合Sun Boy'Z成員麥子豪（Dennis）退出娛樂圈8年，至今仍難忘與好兄弟陳偉霆（William）及張致恒（Steven）當年「同撈同煲」，身在異鄉流淚慶生！贏得難能可貴的兄弟情外，他還直言感激昔日遇上的伯樂，令他平淡的人生充滿機遇及色彩。經歲月洗禮及裝備自己後，Dennis不排除日後重返娛圈發展。

離開娛圈8年，Dennis由初出道的小伙子進化成踏實男。

驀然回首，Dennis形容自己當日「收山」，主因是不甘心當一隻「被擺布的棋子」，於是坐言起行「辭職」，跑去瑞士修讀酒店管理：「入行時得17、18歲，咩都未經歷過，成日都係人哋話畀你知應該做乜。有日突然喺度諗，自己係咪應該掌握番自己嘅人生呢？思前想後有咁嘅念頭，一有決定我第一個跑去同William講，佢冇諗日後組合點算，淨係支持我嘅決定。」

天寒地凍異鄉慶生

對於當年做歌手「特訓」時的辛酸，Dennis歷歷在目：「我哋要日復夜、夜復日咁去練習，有時唱歌、跳舞，有時又健身。坦白講，當時William同Steven比我早出道，為咗追上佢哋，梗係要再努力啲，點知壓力愈嚟愈大。身邊人仲會『訓話』，有時啲說話比較難聽，我就催眠自己，同自己講一定得嘅，好多人鍾意睇我表演。好記得有年我哋3個去韓國做嘢，咁啱遇上William生日，天寒地凍加上語言不通，我哋跑咗去便利店買咗個紙包蛋糕返酒店，大家含住眼淚慶祝，好慘情咁！」

Dennis曾與師姐容祖兒拍廣告，初次在鏡頭前演親密動作。

Dennis直言與前隊友陳偉霆及張致恒仍有聯絡，當中的兄弟情未有丟淡。

感激英皇重點栽培

隨着決定退出，Dennis當日事業上的努力表面上付諸流水，但原來對留學返港、先後從事過飲食、公關及室內設計師等工作的他，奠定穩定基礎：「直至依家，我都好多謝Mani（霍汶希）同楊生（楊受成），佢哋兩個畀咗好多難得嘅機會我。當年Mani好鼓勵我，我話唔做，佢好失望，不過仍然尊重我嘅決定。喺娛樂圈工作嘅幾年，令我呢個草根出身嘅小朋友大開眼界，待人處事都累積好多實際經驗。依家好多工作上幫到我手嘅朋友，大部分都係當時認識番嚟！」

「關公災難」訓練口才

由水銀燈下逐步走向朝九晚五的寫字樓生涯，由17、18歲乳臭未乾的「小白臉」變成30歲的真漢子，Dennis自覺人生變化之大，自己亦始料不及。如今跟隨哥哥從事室內設計工作，更令以往說話「吞吐」的他變得能言善辯：「依家我要面對唔同工種嘅師傅，好似油漆、鋪地咁，佢哋唔會互相溝通，我要make sure佢哋明白，唔會出錯。試過有次幫一間舖頭裝修，人哋擇晒日開張，點知前一晚先知運唔切啲傢俬嚟，我就絞盡腦汁諗點同個客交代，原來所謂嘅『關公災難』行行有，一定要學識點應付同講嘢。」

Dennis現時從事室內設計工作。

Dennis對音樂仍然充滿熱誠。

同撈同煲「兄弟情」

提到昔日在娛樂圈建立的「兄弟情」，Dennis這位大男生笑到腰果眼：「我當初由瑞士留學返港，多謝丁子高搵我入佢公司學做公關，佢比女仔更加細心，喺佢身上學到好多嘢。講真以往做藝人，我同記者關係一般，反而做公關時，成日同佢哋吹水講是非，了解多咗記者嘅辛苦，令大家反而做到朋友。其實到依家我都仲會約William同Steven出嚟食飯傾偈，雖然大家都忙，但見到面嗰種『唔使多講』嘅感覺，係一齊捱過先有。」

考健身牌再戰江湖

「息影」至今，就連當初與英皇的一紙合約亦告屆滿（編按：Dennis當初是「請假」讀書，未有正式解約），問到Dennis會否心癢想再戰江湖？他直言：「當初入行，係自己好鍾意表演，依家公餘時間我都有去修讀吓戲劇課程，最近仲考埋健身教練牌。如果有咁嘅機會，我梗係好樂意試，即使只係有人嚟同我傾吓偈（傾合作），我都好歡迎，起碼可以講畀人聽自己嘅想法、概念同打算。」