認住邱淑貞 卡數一筆清

喺八、九十年代，上天好眷顧香港，帶嚟三位性感女神「豆斗」邱淑貞、葉玉卿同利智，呢三份天神禮物果真花開三朵，各表一枝，絕對係香港人永不磨滅嘅集體回憶。星移物換，豆斗、卿卿同利智都已為人妻，幸好呢三位一代女神將佢哋優良DNA帶畀下一代，沈月、胡芷欣、Jada世襲阿媽優良基因，QC當然有保證。嗱！就好似沈月咁喺社交網晒一晒「絕對領域」，網民心心谷到上鼻，就知呢位星二代幾咁得人歡喜；至於胡芷欣就盡得阿媽最好基因，應有嘅有，多一分膩，少一分淡，Perfect！而Jada長髮飄飄，成為清純女神當之無愧啦。

如何打造「最佳女婿」

話時話，依家女多男少，男生唔識投胎唔緊要，搵個筍盤老婆就可以下半世無憂，呢三位星二代絕對係最佳選擇，咁點先至可以成為「最佳女婿」呢？

好多人會認為，沈月難度一定最高，身為市值近40億時裝王國的千金，就算對日日歎cappuccino兼有時間睇法國電影嘅中產嚟講，着實高不可攀。不過Nuts哥唔係咁諗，沈月先最貼地，因為沈月同胡芷欣最致命分別係地域界限，沈月根在香港，芷欣同Jada根在阿美利加合眾國，只知道近水樓台先得月，Long D好痛苦呀喂！

跟住以下四個錦囊鍛煉自己，原來做「最佳女婿」並非不可能。首次要提升自己Fashion Sense，雖然豆斗老公沈嘉偉旗下品牌多元化，若然「肺甩膠磨」同「露腋拉登」都可以搞錯，就真係要惡補一下；第二係就算唔信，都要對佛學有一定研究，豆斗篤信密宗，若連涅槃一詞都未聽過，建議研讀一下《大日經》、《金剛頂經》同《蘇悉地經》；第三，搞掂未來外母到外父，一定要對車有研究，沈嘉偉名車匯萃在車庫，部部名車有來頭，佢唔鍾意搵司機代勞，自己揸先過癮，若然閣下少爺仔到連車牌都冇，快考快做「頭文字D」；最後亦係最重要，就係真誠同有目標，拍拖始終係兩個人嘅事，就算佢父母嫌你窮的話都唔使理佢，最緊要係自己發憤圖強，證明畀佢兩老睇佢個女冇搵錯對象。

要打得 過李連杰一關

相對沈月，胡芷欣同Jada難度就真係高好多！卿卿夫君胡兆明在美國開超市，飄洋過海入贅唔係唔得，但閣下若天生數口不精，又點做到格價專員幫外父外母打理生意？「來吧甚麼都應承」係冇用嘅，手跟唔到命令，嘴跟唔到數口，談情都係死路一條。

追Jada都唔係一件易事，利智老公係大名鼎鼎打得之人李連杰，若閣下自問好似張無忌咁曉得九陽神功、乾坤大挪移，可以同貴為五次中國全國武術大會冠軍李連杰切磋，咁先有條件踏入首要門檻。Nuts哥認真醒你，就算唔曉九陽神功，都要識小寶神功啦，唔係點同外父過招呀？

Nuts哥