楊千嬅中央肥胖：鹽海都浮唔起！

楊千嬅、周國賢昨早齊出席慈善跑活動，落場參加十公里賽事的千嬅以1小時05分跑畢全程，但跑步期間一度擔心哮喘病發：「天氣潮濕，氧氣唔夠，我都抖唔到氣，唔敢太發力，怕哮喘復發，但係頭先見對面海有舊黑雲飄緊嚟，心諗死啦，所以臨衝線時先發力，好似跌咗銀包追賊咁快！」

「內膽」濕晒

怕「攝親」的千嬅跑完即到酒店沖涼、換衫、飲暖水及圍頸巾保暖，不過覺得跑到「內膽（內衣褲）」濕透是好事，她說：「農曆新年時鯨吞糕點搞到身形發脹，啲人以為我有咗嚟恭喜，雖然我都想，但唔容易。」又嘆已非18、22歲，容易「中央肥胖」，宣傳期見人之時擔心逼爆衫失禮人，笑言：「肥到黑鹽海（註：即為死海，意為鹽海，盛產黑泥）都浮唔起呀！目標係減十幾磅，依家減咗三磅，女人年過30最緊要緊緻，自從生咗仔後，肚皮鬆鬆哋，如果肚皮緊，仲唔着bra top出嚟呀！」她指老公丁子高是其減肥動力，老公曾取笑她：「企埋余文樂度似佢家姐，未似佢阿媽都大鑊。」

楊千嬅朝氣勃勃，晨早參加慈善跑。	周國賢（圖）出發跑半馬時信心十足，跑完驚自己會暈低。	放大圖片

周國賢驚暈

另外，談及千嬅、梁漢文及陳奕迅（Eason）以「華星三寶」之名合作，但因各屬不同唱片公司難以合唱，她說：「Eason話諗吓，但諗咗幾個禮拜。」千嬅曾考慮合拍《三成故事》講香港情懷及發放正能量，還說：「做嘢做三成，但片酬收足。（合唱電影歌？）會，唔好嘥。」

周國賢則以2小時15分完成半馬賽事，自言跑到面青的他因落雨全身濕透：「尋晚瞓得兩個鐘，我都怕暈低。（咪可以做C1？）我都諗過，依家下身冇感覺，一陣要返去食麻辣火鍋。」他又指身為嘉賓有「唔衰得」的心理壓力，初時沒有發力跑，因不停被人「Cut線」很不順氣，至10公里才發力反超前，惜臨尾已冇氣。

文：音樂組