城城掟千萬搞車隊 下一站Plan生仔
【衛紫敏珠海直擊】天王郭富城熱愛賽車，據知他早前一擲千萬元圓心願創立「富盛車隊」，成為首位成立車隊的香港藝人老闆，並羅致法籍賽車手Olivier Lombard任首席賽車手。昨日，城城與Olivier齊齊現身珠海國際賽車場出席車隊成立發布會，還為將出戰FRD LMP3（原型車）「極級先鋒系列賽」的戰車主持揭幕儀式。
榮升車隊老闆的城城西裝畢挺現身，期間未有透露投資數目：「投資晒落去啦！組車隊係自己夢想！Olivier係法國人，好浪漫又靚仔，吸引唔少女車迷。（幾時親自落場？）遷就到檔期都會，但會以工作行先！自己都想落場。」
取名「富盛」紀念父親
城城又表示未親自試過LMP3戰車，希望5月中賽事前可以一試。問到可會與同樣有車隊的台灣藝人林志穎落場比試？城城坦言睇緣分：「相信同場都會有較量，但自己技術冇佢咁好，會傳短訊叫佢揸慢啲先！」提到上次在港出戰時有女友方媛到場打氣，今次女友可再來？城城開心說：「希望會啦！始終係車隊第一次出賽，但都要睇我落唔落到場先。」至於車隊命名為「富盛」是否意味想「開枝散葉」？城城哈哈大笑說：「其實個『盛』字係當年爸爸金舖其中一個字，想紀念爸爸，有傳承之意，咁開枝散葉都係好重要，都有少少Plan嘅。」此外，曾演出電影《風雲》的城城被問到有否留意《風雲5D音樂劇》中鄭嘉穎的步驚雲造型？城城笑問：「乜步驚雲有好多個造型咩？我未睇呀！天華同譚耀文都係好朋友，祝佢哋舞台劇成功。」
