克勤話太太忙 冇時間進修襯衫

歌手李克勤前晚為節目擔任表演嘉賓，讚無綫今次的表演舞台夠揼本，除了有360度舞台外，其餘跳舞及樂隊等均起用演唱會班底，認為邁進一大步有助應對競爭激烈的電視行業。剛於前一晚着黑色大褸自嘲似「垃圾袋」的克勤，前晚身穿白色西裝，指全是太太盧淑儀配襯：「我唔會理呢啲嘢！識條鐵咩！佢畀咩我就着，我冇呢方面品味。（太太有冇收酬勞？）邊有得咁計！佢有天分嘛！用我錢買再放喺我身上，仲出埋鏡，抵咗！」問到可會讓太太進修時裝？克勤笑指太太照顧一對兒子，已沒有多餘時間：「佢今日又帶對仔去愉景灣嘅同學生日會，仲過埋夜，我叫佢唔好去嗰間（關淑怡入住）酒店，好多記者o架！」