變態因子蠢蠢欲動 蔡卓妍好想做喪屍
【李詠林、林蔚恩紐約直擊】蔡卓妍（阿Sa）拍過不同類型的電影，但原來她最恨演喪屍，想寫一套喪屍片，更擔心自己的故事太過變態！演員方面除好友鍾欣潼（阿嬌）外，她更想找容祖兒演出，大讚祖兒天生是喜劇演員，愛搞笑又愛搞事！
首次參加紐約時裝周的蔡卓妍（阿Sa），早前在當地接受本報專訪，更無懼零下氣溫，衣衫單薄地穿梭紐約街頭拍攝，不得不佩服她的拚勁！事業上，阿Sa一樣努力不懈，兩年前憑電影《雛妓》勇奪《大阪亞洲電影節》的「特別表揚獎」；今次再接再厲，與原班人馬導演邱禮濤及編劇李敏組成「鐵三角」拍攝英皇電影《原諒他77次》，更入圍今屆《大阪亞洲電影節》競賽單元，阿Sa說：「入圍已經好出乎意料之外，唔係特登拍套戲嚟畀自己拎獎。我覺得拍一套戲出嚟，畀大家娛樂同反思都幾好，多謝編劇李敏寫咗一個咁好嘅故事畀我，今次邱禮濤導演用咗一種幾唔尋常嘅手法拍，幾得意。」
祖兒？好好嘅喜劇演員
雖然新片沒有加插自己的愛情故事，但談及編劇或導演工作，阿Sa竟想寫喪屍片：「我驚自己啲故事變態！我真係想拍一部自己好想拍嘅戲，我好想做喪屍，寫一個喪屍故事。做導演？有諗過，好多導演同幕後朋友撩我搞啲嘢，但真係未有時間，因為我知咩係好嘢，我冇咁嘅能力拍到咁好，驚令自己好沮喪，依家學吓嘢先，我驚我做導演會癲咗，精神緊張，我驚拍唔到自己心目中嘅效果。」
至於演員陣容，阿Sa必選好友阿嬌及容祖兒，更大讚祖兒好好拍：「演技同拍戲方面，啲人覺得冇佢唱歌成績咁好，但我覺得佢非常好拍！佢同熟人拍嘢會發揮得好好，佢拍戲可能緊張，但佢係一個非常好嘅喜劇演員，佢本身就係好喜劇嘅人，個人又搞笑又搞事！」
談到新片《原諒他77次》，阿Sa打友情牌找好友阿嬌演出，但否認加入了其愛情故事：「比起其他團隊，我唔可以話我做咗啲乜，只係收咗李敏個劇本，睇咗好鍾意就搵老闆投資，我老闆又OK，叫做自己搞套戲出嚟，都想搵朋友拍，但要經導演同編劇嗰關，唔係自己搵邊個就搵邊個。我希望票房好好，因為第一次叫做同老闆開口，唔好蝕啦！起碼要打和，先會有第二同第三部。」
出軌？絕對唔可以原諒
提到現實中，在愛情上原諒另一半的底線，她說：「要睇係咩，有啲嘢會超越底線，唔好話77次，一次都唔應該！出軌係唔能夠原諒！」但問到前度有否試過出軌，她就不想講。至於與男主角周柏豪的火花，她表示二人因今次合作而熟落，大讚對方有才華、好叻仔：「我係電子嘢同電腦白癡，佢呢方面好叻，我有咩上網問題、朋友有咩疑難就搵佢，佢呢方面係專家，又好勤力，第一次合作幾深刻！」
至於邱禮濤與李敏，阿Sa表示今次合作令大家默契昇華，更覺得自己獲「厚待」：「導演有時一、兩Take就OK，搞到我會諗『係咪真o架？會唔會佢投放咗朋友嘅感情？係咪咁順攤！』反而係我想拍多幾個Take。」
雖然感情上暫時落空，但正能量滿滿的阿Sa，仍找到生命中的「維他命」！她認同李敏在愛情小說中所說，女人無論甚麼年紀都好，心中都居住了一位少女，而愛情小說及電影則是維他命。希望阿Sa那顆「少女心」，可以帶領她找到其愛情故事中的男主角，然後快樂地生活下去，永遠永遠……
形象：PIPA
化妝：Natalie Soo@ND&Co.
髮型：Sing Tam@O4
服裝：Coach