子丹愛妻最強齊家冇誘怕
「宇宙最強」甄子丹於鏡頭前甚麼宗師、超人統統演過，拳頭下的他卻樂於做個慢活、溫柔的住家男人，原來是他的一個平衡方法。也許「愛妻號」形象很鮮明，他坦言從沒有誘惑在自己身上出現過，不是沒有魅力，而是無謂自討沒趣！
甄子丹連續五年擔任「寶馬香港打吡大賽」的打吡大使，本身是馬主的他與太太的妹夫蔡加讚聯名擁有愛駒「宇宙車神」，他認為賽馬是香港一個歷史文化，雖然自言對買馬仔認識不深，但娛樂一下亦無妨。近年，子丹在事業上的成就有目共睹，電影一套接一套，有時一拍便幾個月，難怪他慨嘆沒時間陪伴家人：「我嘅人生有兩個甄子丹，一個係工作嘅甄子丹，一個係家庭嘅甄子丹，就係咁簡單！依家仔女大咗，有時太太會帶埋仔女嚟探班，畀佢哋見識吓，又可以當見吓面！」太太汪詩詩曾取笑老公如在外國拍戲會要求視像通話，真的如此癡纏？他直認不諱：「以前冇呢個科技，感覺同屋企人好疏離，依家有咁好嘅方法點解唔用？」
冇方向感 畀老婆哦
除了「宇宙最強」外，子丹還是圈中出名的「愛妻號」，外號一剛一柔可會接受？他笑說：「愛妻係一個美德，等於人哋話你有禮貌唔會唔認，係好事！（喺屋企聽晒老婆話？）其實呢個係我嘅平衡方法！拍戲時我有一定嘅操縱空間，有時唔只是演員仲係監製，每日工作壓力好大，返到屋企就唔想再踩行油。太太有時問我點解行路咁慢？我話因為你高過我，對腳長過我囉！哈哈！我覺得工作時已經踩行油，太專注工作好容易唔記得嘢，好似我方向感好差，太太成日哦我，試過喺美國泊咗架車搵唔番，原來係泊咗喺另一個停車場。」難怪在家的日子，他選擇享受慢活！
創意用盡 先諗退休
事業上用盡101分力，為家庭同樣全心付出，子丹坦言重要的日子還是不會忘記：「無論做咩都應該要有進步同提升嘅空間，事業家庭都係，如果日日食飽就去廁所同瞓覺，人生就冇意義！我唔會自滿於現狀，拍戲會想拍更好，老婆開心就想佢更加開心！好多人問我幾時退休，我覺得如果有一日冇晒創意同想法，覺得好攰就應該會退休，但依家仲有好多計劃！」有指汪詩詩旺夫，令子丹事業更順？他笑說：「旺夫係好抽象，唔係風水！兩個人結得婚就係有緣分，相處要有正能量，中國人有一句說話『齊家治國』，家庭融洽，事業唔會差得去邊？一個人嘅成功唔係淨係話你有冇料，係要有好多嘢支持，家庭支持係好重要，我愈嚟愈相信，所以我覺得自己非常幸運！」
甚少夜蒲 零飛來蜢
常言道娛樂圈是一個大染缸，子丹卻出於污泥而不染，行行出狀元，行行也可以是大染缸，自身才是誘惑的餌，真的從沒有飛來蜢嗎？他想了一想便說：「我可以話畀你聽係冇，因為我好檢點，好少夜生活。誘惑即係慾望，慾望係睇你本身，我好知自己人生取向。依家嘅娛樂圈更加有透明度，可能因為狗仔隊、或者網絡發展，根本冇秘密，一個咁透明嘅工業，大家都會自律啲！」
後記：養不難．育不易
子丹與汪詩詩雖已有兩名子女，但老婆曾表示想再生小朋友，子丹亦坦言有這個念頭，因為子女開始大，會想念他們小時候的樣子。養不難但育不易，子丹表示不抗拒亦不刻意，一切看上天的緣分！
文：Ada Lam
攝：鄭家俊
服裝：Dolce & Gabbana
化妝：諺瞳‧小白
髮型：Kenji IL colpo PP
Stylist：Harry Lam