張秀文追「上車」搞網購賺首期
「咪神」張秀文昨日收起「咪咪」 單靠把口搵食，為免臨場出錯更早到一粒鐘背稿，認真勤力！提到密密接Job儲首期，她呻樓價愈來愈高，故打算開源節流計「師奶數」，還透露有意進軍網絡搞生意！
無綫小花張秀文昨日到鰂魚涌擔任《AEON永旺（香港）百貨有限公司30周年啟動慶典》的司儀，較少「靠把口」搵食的她特別提早一小時到場背稿，非常盡力。平日例必谷胸上陣的她今次突然「封胸」，她笑說：「如果個客唔要求（性感），我都會Warm少少嘅，總之睇場合啦！（要性感就收貴少少？）差唔多啫！最緊要大家有共識。」
自認「大女人」唔靠男友
談到早前「自揭身世」與家姐同住時要瞓廳，立志買樓的秀文被問到儲夠首期未？她透露仍努力中：「不過樓價真係追唔到，好似學吓投資同做生意好啲，開源節流計『師奶數』。其實都有朋友搵我合作，可能會搞啲美容、女性用品代購咁，自己鍾意網購買平嘢。（搞網絡生意？）都覺得依家嘅大趨勢係網絡平台。」
至於會否將上車「責任」交給男友，秀文說：「我比較大女人，覺得自己有能力重要啲！我又未結婚，如果分手有手尾點算？未聽過有人打官司攞番啲嘢咩？我唔想要拗撬。（遇過呢啲例子？）我想再見亦是朋友，拍拖普通請食飯就OK。（以前試過收好貴嘅嘢？）唔好講，講出嚟嚇死人！如果有唔使咁閉翳啦！都係收啲公仔同玩具之類。」
文：影視組