哈利王子剃胸毛「反光板」冧女
英國哈利王子（Prince Harry）近日與視星女友馬克爾（Meghan Markle）打得火熱，日前更被爆為愛情而將心口Man爆的胸毛脫光光，慘變滑溜「反光板」冧女，搞到被老友恥笑！
32歲的哈利王子與35歲的馬克爾近期愈戀愈高調，日前有英國傳媒爆出男方一反「女為悅己者容」的傳統，作為男士都積極扮靚冧女友，更將心口旺盛的體毛以脫毛蠟脫清，變到白白淨兼光禿禿！
不過此舉就令老友笑爆嘴，有知情人士仲爆料指：「哈利一向都係男人中嘅男人，今次（脫毛）對佢班熟朋友嚟講堅係好驚訝，佢心口依家好似於《沙灘拯救隊》（Baywatch）見到嘅男人咁，但佢就冇古銅膚色。」傳聞未經證實，但哈利王子近日外出戲水時，望落心口真係比以前滑淨好多！
關注印度女童問題
此外，馬克爾就未有理會傳聞，日前於《時代雜誌》（Time Magazine）網站撰文，講到早前到印度探訪的經歷，為當地兒童的教育問題發聲。馬克爾於文中大嘆當地女童未獲正確教育有關月經的常識，以致影響學業：「好多女仔以為自己身體每月排出邪惡的靈魂，又或者以為自己受傷。」加上當地學校的洗手間與衞生設備不足，不少女童會缺席課堂，以致學業成績比不上男孩。馬克爾另指女童一旦輟學，還可能會被迫打工賺錢或提早嫁人，因而呼籲大眾關注當地有關月經知識的教育問題。
文：外娛組