張偉文激瘦復出：真係行得番！
「靚聲王」張偉文前晚擔任好友呂珊的《珊珊來臨世畀巡迴演唱會》嘉賓，去年接受腰椎手術的張偉文因糖尿腳搞到失平衡，激瘦的他要靠拐杖支撐，又自爆手術前一度擔心不能再上舞台，幸好手術非常順利，難怪他開心地說：「點知真係行得番。」
腳似踩棉花
休息三個月的張偉文手術後首度公開演出，問到有否影響唱歌，他說：「冇乜影響，但好多嘢唔記得。（恢復得好好？）係，不過糖尿腳令我成日感覺好似踩棉花咁，冇晒平衡力，除非除鞋赤腳，但出街一定要着鞋。依家唔可以跌，否則就麻煩，去遠地方就要坐電動輪椅。」他又透露正與主辦單位洽談到美國及加拿大登台，又指坐飛機最辛苦，因為腰骨要坐到好直。
而戴上白假髮的呂珊感激對方一口答應做嘉賓，她說：「手術前已經叫佢，起初以為佢唔肯，點知佢應承，見佢行得好，雖然坐喺度唱，已經夠唱又夠煞食。」正開拍兩套劇集的呂珊透露個唱後要開工：「時間好逼，真係頂唔順，好眼瞓。（搵多啲嘉賓自己唱少啲？）唔得，咁咪呃錢囉。」
文：音樂組