談善言啜陳柏宇個心卜卜跳
演員談善言在新片剃頭飾演癌症病人，與陳柏宇演一對。她表示拍攝咀嘴戲經驗不多，故拍攝時心情緊張，心跳加速！外表斯文的她自言最想演變態角色，果然女人心永遠難以捉摸！
影壇新人談善言最近為慈善新片演癌症病人，更為角色向導演自薦剃頭演出，犧牲甚大！她與陳柏宇在片中有咀戲，自言拍攝時緊張得心跳加速：「拍咀戲經驗唔多，上套戲拍過一次，雖然冇尷尬，但心情都幾緊張，拍嗰陣心跳加速！」
番梘Gel頭試效果
提到為角色剃頭，她說：「今次角色最大突破係要剃頭，拍戲嚟講今次可以話係最大犧牲，但個人嚟講感覺還好，因為成世人都未試過剃光頭，做BB仔都未剃過頭，所以連阿媽都好期待個光頭Look！」談善言過往雖然不是長髮披肩，但由短髮變成光頭，內心難免有不少掙扎，她說：「喺屋企試過用番梘整貼晒啲頭髮，試吓光頭效果。自己頭形還可以，同埋屋企有假髮，如果光頭唔靚咪戴假髮出街囉！」問到可擔心光頭Look會嚇怕異性？她笑說：「細個成日畀人以為係男仔，可能光頭同冇化妝會好似男仔o架！」
最想演變態角色
談善言有股文青味道，光頭Look豈不是會減輕書卷味？她說：「咁可以展露其他嘢，自己好想做一個演員，希望可以建立到演員形象。」問到外表斯文的她最想演甚麼角色？她笑說：「變態同好偏激嘅嘢平時唔會做，喺我生命中冇發生過，所以希望可以嘗試！」
文：影視組
攝：黎志輝