鍾舒褀唱到上太空密謀外國參展
歌手鍾舒祺（Sukie）有鋪上太空癮，新歌《免責條款》MV，Sukie不惜工本變身太空人，以石灰水泥打造出月球表面，這個模擬外太空的MV，Sukie沒想過是為吸睛贏網上點擊，反而帶它衝出香港到各地參展。
Sukie繼之前歌曲《心嚎》MV有幕升空鏡頭後，似乎做太空人做開有癮，早前其新歌《免責條款》又再Encore，今次更玩登陸月球，相當大陣仗！然而對於已回復獨立歌手身份的Sukie玩到上太空的MV製作費不菲，她說：「太空構思想拍好耐，呢首算係《心嚎》嘅續集，係講上咗太空之後，所以拍攝嗰日廠入面用咗好多石灰英泥，做一個月球表面嘅感覺，因為同啲灰好近，拍咗成日，又唔戴得口罩，真係吸到有少少暈，除啲衫出嚟，連褲浪、鞋同襪入面都可以倒啲灰出嚟。」
贏點擊都開心
正所謂贏在點擊上，問到對MV可有期望？Sukie說：「我係好想拍呢樣嘢，而做到出嚟，我都希望好多人睇到，但唔係為點擊數字而拍，當然有100萬、200萬點擊，我梗係開心嘅！」然而她對MV卻另有期望：「我會拎佢去參展，參加外國嘅影片展，睇下有乜嘢可以參加，講真，香港行業好多掣肘，冇乜空間去做到，但我同導演就好想拍太空嘅嘢，係一拍即合，亦好開心可以拍到效果出嚟。」而Sukie由大公司跳出做獨立歌手，她承認是困難事，十萬樣事情都是自己一手包辦，但勝在很自由。
幫年輕人唔使撞板
問到何以千辛萬苦仍要做歌手？Sukie說：「我覺得音樂係一樣不能缺少嘅事，我嘅經歷或者係以後有啲年輕人會行嘅路，我想將我嘅經歷話畀佢哋知，等佢哋吸收到，或者幫佢哋跳過我撞過板嘅事，我覺得好有意義，我嘅Target係年輕人。」Sukie回想當年讀完書便走上比賽舞台，那段時間對她人生好大改觀，因為社會並非她想像一樣美好，但她又不能改變世界，惟有自我作出調整，而這個經驗她相信每個年輕人都會經歷過，亦希望早些讓年輕人知道去有所準備。
場地：銅鑼灣HMV
文：音樂組
攝：劉智源