鍾采羲擴闊眼界唔吼圈中男
藝人鍾采羲（Iris）身材婀娜多姿，被定型為性感女星，她坦言不介意，認為性感不是一件壞事，反而介意另一半是圈內人，她表明態度：「將來冇人知，但過去或現在，都唔會選擇圈內人做男朋友，好想伴侶帶我去睇另一個世界！」
模特兒出身的鍾采羲（Iris）早前為無綫拍攝電視劇，首次演奸角的她感到很新鮮：「入行五年，都係演大癲大肺同性感角色，做奸角都幾得意，同自己唔一樣。」她坦言入行初期擔心被定型為性感女星，但後來覺得這不是一件壞事，不過家人經常勸她轉行：「佢哋想我結婚，覺得女仔唔使咁捱法，做個簡單幸福嘅人就得，我明嘅，第時我有仔女都會咁諗，惟有盡量畀啲安全感佢哋。」
未圓父母「嫁女夢」
要結婚，首先要有一個男朋友，但Iris現時還是單身狀態，暫時未能一圓父母的「嫁女夢」，問到擇偶條件？她坦言抗拒圈內人：「將來冇人知，但過去同現在嘅自己都唔希望搵行內人，因為我知道呢行係點，好想伴侶帶我去睇另一個世界，我想接觸從來都冇接觸過嘅行業。」她又表示印象中沒有圈內人追求過她。
內地拍劇驚思鄉
感情未有着落，惟有寄情工作，Iris三月就要回內地拍電視劇，她說：「第一次去北京、深圳咁耐，有啲驚思鄉，因為我好鍾意黐住屋企、黐住身邊人，到時惟有黐住同事囉！」除了拍劇外，她現時最想嘗試主持工作：「我好鍾意講嘢、好鍾意交朋友，做主持可以多啲機會用真實嘅自己，相信自己有呢個潛質，當然要訓練一下。」她自言不懂造作，能夠於幕前表現到真實的自己，是一件開心事。
場地：K.H.WorkHouse@Tai Ping Shan Street Gallery
文：李惠儀
攝：李柏儒