林作巨胸黃建東3千呎豪宅搵高潮
惡搞高手黃建東與前大狀林作破天荒合作拍搞笑短片，林作以「韓仔頭」加煙熏眼妝亮相，與反串扮女人夾出5吋事業線的黃建東，於林作的三千呎豪宅中扮高潮，明顯向《有樓》「高潮女」Seasun抽水，非常爆笑！
無綫藝人黃建東之前因惡搞「神曲」《PPAP》而闖出名堂，昨日他在網上公開新作，竟有前大狀兼「十優港姐」麥明詩前男友林作亮相。片中扮女人的阿東擠出五吋事業線，身穿黑絲和黐上假下巴，取名「Threesome」的他更「高潮迭起」，明顯惡搞早前無綫節目《有樓萬事足》「高潮女」Seasun。而一向以凌亂「旋風頭」示人的林作，換上「韓仔頭」加皮褸造型出場，更化了一個MK味濃的煙熏眼妝，二人於豪宅由大廳玩到入廚房，再由梳化「煙韌」到上床，效果爆笑。
厚亂頭髮最難搞
阿東透露因林作只清一色得西裝和紳士外套，故他特地帶備私伙為對方大改造：「我想佢着得Rock啲，最初我嘗試幫佢Set頭，但係佢嘅頭髮太厚太難搞，所以最後交畀髮型師負責。」提到合作契機，阿東表示早前在一個晚宴認識林作，一拍即合，並想一齊拍片：「我第一個構想就係想改變佢嘅髮型同形象，咁啱『高潮女』Seasun熱爆，佢講過有二千呎屋至有高潮，又咁啱林作有三千呎大宅，所以度咗個『高潮東遇上三千呎林作』嘅故事。」他感激對方借出豪宅，更因林媽媽未有投訴廚房被整污糟而大受感動。
由朝拍到晚散晒
至於林作亦非常喜歡自己的新形象，讚阿東是港版「波叔」沙查巴朗高漢（Sacha Baron Cohen）：「無論佢想點做我都願意配合。由早拍到晚我人都散，但阿東仍然精力充沛不停調整拍攝，非常犀利。」
文：影視組