廖碧兒收埋新歡唔畀驗貨

的確，喺廖碧兒較為人熟悉嘅幾段情入面，先有前度劉愷威喺分手後，一吐烏氣，喺內地爆紅做咗一線男星，仲娶埋內地新四小花旦之一女神級嘅楊冪做老婆，生咗個女小糯米。

繼而有前度陳豪，分手後飛躍進步，視帝都攞埋，仲娶咗陳茵媺，兼夾只係用咗三年時間就三年抱三，仲要係想生仔，就生仔，想生女，就生女，劇情照足自己意思發展，更加估唔到嘅係出道初期，把聲爛到阿媽都唔認得嘅佢，竟然連我最喜愛的歌曲大獎都攞埋，名副其實係佢嗰句金句：「Perfect池！」同分手前嘅際遇相比，真係天與地！

放大圖片

放大圖片

角色被定型「好勝」

即使圈外前度林忠豪，分手後亦一樣「活得比你好」，同咗又靚又叻嘅Susanna Yiu拍拖，感情穩定，鬼咁sweet sweet！

眼看那傾慕過的、傷害過的、不見光的、不便說的，從前每個男孩如盛放的花朵，唯獨只有廖碧兒自己過盡千帆，依然斯人獨憔悴，只能喺舊愛結婚了，新娘不是我之際，喺人哋微博留句：「Congratulation！」本來對舊愛送上祝福都算係大方表現，只怪佢早年回應有指佘詩曼介入佢同陳豪之間時，佢話：「係你嘅就係你嘅，唔係你嘅就唔係你嘅！」聽落就同「山係石頭，海係水」一樣咁上下嘅見解，不過佢嗰個勝利者式嘅笑容，嗰種暗窒阿佘嘅意氣風發，搞到被人定咗型話佢好勝，就連佢早輪被指有神秘富豪男友，搬到大埔千萬豪宅居住，都話佢專登要住近前度示威。

女版「愛情幸運星」

係咪好勝都好，廖碧兒冇再好似以前咁以勝利者姿態嚟回應咁低EQ，而佢轉性嘅轉捩點應該係2008年喺溫哥華經歷咗一場大風雪，佢事後講：「後來有次我喺法國睇葡萄園，有隻蝴蝶停喺我手上，令我有所領悟！」竟然一粒沙裏看世界，半瓣花上說人情，你唔覺奇怪嘅咩？雖然佢冇詳細講係咩嘅領悟，但極有可能係佢終於發現咗自己擁有令前度浴火重生，變身火鳳凰嘅使命同Magic！就好似荷里活影星謝茜嘉艾芭同Dane Cook主演嘅《Good Luck Chuck》（愛情幸運星），講Dane雖然高大靚仔，但佢中咗咒咁，凡係就算再醜再肥再冇人吼嘅女，只要同佢「企一晚」，之後都會即刻搵到幸福好路數！照咁講，雖然廖碧兒出名係「情場走寶王」，但佢都算係立下好多功德，睇番劉愷威、陳豪、林忠豪，同佢拍過拖、好過、散咗，然後就買埋樓結埋婚做老襯，順風順水行好運！

話時話，真係做戲咁做咩！拍戲都有話如有雷同，實屬巧合啦！廖碧兒樣靚身材正，話晒係華姐冠軍，個個數番佢啲前度依家有幾好，其實分分鐘佢將來嗰個好過班前度一百倍都未定！之不過鬼妹仔嘅佢平時無事不可對人言，點解之後不斷傳佢有新歡佢都唔聲唔聲唔表態，就係費事畀人對號入座，萬一有咩冬瓜豆腐，真係有第四個臨床實證出籠，到時真係水洗都唔清！

Nuts哥