江美儀「細女」受盡打擊薛家燕收留助渡難關

無綫劇集《親親我好媽》題材貼地，獲不少觀眾追捧，當中飾演江美儀及黃智賢細女的熊子逸披露悲慘身世，八歲時捐骨髓救患白血病的弟弟、九歲親眼目睹感情要好的表哥被跳樓婦人壓死，兩年前弟弟因骨髓排斥最終不治，及後父母離婚。家逢巨變的子逸幸得薛家燕出手相助，子逸因早年在對方所辦的藝術訓練中心學演戲而結緣，當時子逸的表哥無辜被壓死，家燕給予其家人兩萬元解燃眉之急，又接子逸到其家中暫住，更帶她睇醫生包辦醫藥費。拍畢劇集後，子逸在媽媽支持下與哥哥赴新西蘭讀書。

提攜演無綫劇

對於熊子逸在《親》劇有好表現並大受關注，當年一手提攜她到無綫拍劇的薛家燕都大感安慰，更表示對方到新西蘭升學亦跟其母商量給予支持：「佢喺個劇有咁嘅成績我都好安慰，今次佢去升學，我都有畀意見，佢媽媽覺得對我唔住，好似拍咗個劇有啲表現又走咗去，但我同佢講，人梗係要有學識重要啲，讀完書再返嚟做演員都未遲，所以我都好支持佢去升學！」薛家燕亦認識子逸的弟弟：「佢細佬都喺我度學過跳舞，其實子逸捐完骨髓之後，佢媽媽都有捐，最後都唔得，真係好陰公，細佬好乖，即使做治療嗰陣佢都有WeChat我，同我講佢食咗藥，我唔捨得Delete段錄音。」對於子逸的表哥被跳樓婦人壓死，她說：「好難過，都係小小意思畀兩萬蚊帛金，佢喺我度住嗰一星期成日匿埋喊，我個女就陪住佢，去杭州表演都帶埋佢去，順便同佢散吓心。」

江美儀與黃智賢戲裏戲外都愛錫「細女」熊子逸。	薛家燕當年陪伴熊子逸渡過難關，亦對其經歷感難過。	江美儀為新節目《屋邨遊樂團》宣傳時玩集體自拍。

江美儀讚精叻乖女

至於江美儀昨日與滕麗名、陳浚霆等出席節目《屋邨遊樂團》活動時，提到子逸身世悲慘，江美儀表示不方便談論別人家事，但透露曾勸目前身處新西蘭讀書的子逸先專心完成學業。江美儀說：「佢依家係個好叻同好乖嘅女仔，佢媽媽供養佢同哥哥去新西蘭讀書。劇集播出後，佢好想返嚟，但我勸佢唔好返，享受自由時間，讀好晒書先。佢媽媽都叫佢問我意見，佢真係當咗我係佢阿媽！」

文：影視組