何國鉦設計制服 創出「錢」途

何國鉦（Dorian）做時裝設計多年，儲了不少明星名媛客戶包括鄭裕玲、周慧敏、鍾麗緹、趙雅芝、李玟、蔡加敏、何倍倩和戴凱欣等。近年經濟持續放緩，各行各業幾乎也受到影響，做晚裝的客減少，但他的收入不減反升，原因轉數快的他幾年前已開始兼做公司制服，多年來為不少企業設計制服，收入可觀，他說：「以前啲企業做制服好公式化，A衫+B褲+C外套，然後釘個公司logo就算，係呢5年流行搵設計師做制服，原因企業競爭激烈，畀人第一個印象好緊要。」

「一張單試過700萬」

做制服跟度身訂造大不同，但他認為制服更有挑戰性，因為多人着，更有自豪感：「制服係日日着，日日洗，有可能一套衫要着十年，實用性加慣用性，唔容易做到。初時試過接咗做設計，但個客搵其他人生產，點知出咗問題，同我設計有出入。」於是他向客人建議設計和生產一手包辦，之後再建議做企業培訓，以確保自己設計保持風格，慢慢竟開拓了做制服的門路，先後跟銀行、珠寶店和航空公司合作，他說：「試過有啲公司職位多，員工多，夏天同冬天，每人每季兩套，一張單試過700萬，都唔錯。」他續說：「呢幾年市道係差咗，對高訂時裝影響大啲，但制服生意反而有增長，可以互補，所以我唔會放棄自己品牌。」

為母校設計校服

早前Dorian更為母校培正中學周年紀念設計服飾，是他首次設計學生制服，他說：「我好想試吓設計校服，有啲學校校服好肉酸，肉酸到唔想返學o架！哈哈，我諗做校服會好玩。」

文：Tracy Leung

攝：唐豁莊