達明拉近距離 驚被扯褲

由黃耀明及劉以達組成的達明一派，將於3月23至25日假紅館舉行《達明卅一派對演唱會》。第四度登紅館開騷的他們，除按照傳統為每次演唱會創作《排名不分先後左右忠奸》新版本外，今次更會首次挑戰四面台。黃耀明說：「可能香港觀眾好慣睇四面台，但我哋唔慣做，所以都畀個challenge自己，試吓改個呈現方式。我哋係好細嘅四面台，所以啲人可以更近我哋。」問到是否近到掂到？劉以達表示：「可以(口架)，掹鞋呀，扯褲呀。」不介意歌迷做這些事？他即謂介意，認真搞笑！

拒再扮夢遺大師

問到可會邀請嘉賓好友同台獻唱？兩人謂暫時未想，但笑言個台可能細到只夠他們兩人企。問到可會重現兩人當年的經典造型，如長髮look？劉以達即耍手謂：「唔好搞。」問到有何特別環節？劉以達謂：「我哋唔會跳火圈。（扮夢遺大師？）嘩，唔得喎，嗰啲拍戲就得。」而黃耀明就指演唱會有部分會講香港時事：「無論係舊歌定依家嘅歌，都係同時代好緊扣，唔講反而仲奇怪，但達明一派亦唔淨係關於政治。」問到兩人可需要keep fit？黃耀明表示：「大家都要，唔淨係身體，係個狀態、聲音同氣。」劉以達笑謂要減肥，望可以減10磅。黃耀明即笑他可以用結他遮肚腩代替：「唔緊要，佢嘅好處就係成日都有個結他喺度，所以結他手好抵。」

兩人無意重現當年的經典造型。

兩人透露會將個唱舞台縮小，與歌迷近距離接觸。

不同年代照Jam歌

提到今次演唱會找不到贊助商，由環球唱片公司全力支持及主辦，有指是與黃耀明過往一些言論及政治見解有關，問到可會對開騷造成無形的壓力？黃耀明表示：「我諗佢同我哋主辦一定知道，佢冇諗住話你唔好唱呢首歌，或唔好講呢啲嘢。」提到剛推出的專輯《達明一代》，邀請了不同歌手及樂隊演繹作品，如符致逸、觸執毛等，當中大多是後輩，唯獨葉德嫻是前輩，對此他們表示：「咁好玩啲，因為有唔同年代嘅人，都係我哋自己嘅虛榮，紀念吓我哋嘅周年紀念，所以搵一啲我哋好喜歡嘅人玩。」

化妝：Vanessa Wong

髮型：Ivan Lee @Headquarters

文：音樂組　

攝：劉智源