陳敏之專心湊B工作輕鬆為上！

藝人陳敏之於去年冬至誕下兒子雷子樂，提到她在播映中的新劇《親親我好媽》中，飾演名校教師，更是單親媽媽，拍此劇尾聲時，敏之才發現自己剛懷孕。她日前接受專訪時說：「嗰陣係有計劃生BB，但冇話好勤力，就喺拍呢齣劇臨尾嗰個月知道自己有咗，真係緣分嚟！不過嗰陣未夠三個月，又唔可以同人講，惟有自己小心啲。」

老公負責「夜更」

說到拍劇要捱更抵夜，老公當時是否很擔心和緊張？她謂：「佢都唔係好識處理，頭三個月自己都好緊張，驚佗唔穩，之後自己就好輕鬆，到依家做咗人媽媽，湊住一個初生嬰兒，真係好有難度。」敏之向來是緊張大師，湊自己的骨肉當然親力親為，她笑言：「媽咪都成日幫我，畀時間我休息，老公就負責夜更，換片、餵奶一腳踢，佢算有耐性，比我想像中表現好，佢都好錫個仔，個仔唔單止係我情人，仲係我老公個情人。」

在《親親我好媽》中，陳敏之與韋家雄有不少對手戲。	陳敏之現時有仔萬事足，一切都以B仔行先。	陳敏之生仔後，上圍及Pat Pat都大了，難怪她笑言唔想減。

產後補身勁強壯

敏之即將開拍監製劉家豪的新劇《溏心風暴3》，一拍便拍至7月，問會否不捨得經常離開兒子？她謂：「呢套劇係剛剛懷孕時家豪哥mark咗我個期，我都好想拍家豪哥嘅劇。（有否要求拍劇時間？）冇乜，只係惆悵點樣Pump奶，身體方面我覺得仲比以前強壯，補咗身好潤，之後都會去做機收身，因為生完暫時未可以做劇烈運動，但依家胸同Pat Pat都大咗，都唔想減，好開心。」她坦言拍完《溏3》後，就會專心湊仔：「做啲輕鬆啲嘅工作，時間唔太長嘅，司儀都OK，總之乜都個仔行先。」

髮型：Eve

化妝：Jessica Chan

服裝：St.STUDIO

文：影視組

攝：張福宏