祖兒對浩龍愛不夠

容祖兒昨日到電台宣傳下月在香港演藝學院歌劇院舉行的14場《容祖兒．MY SECRET．LIVE》演唱會，講到個唱掀起撲飛潮，問到是否還有很多飛債？她說：「係呀，主要唔係因為我特別受歡迎，而係呢個騷特別少飛，呢個Side Track演唱會以為淨係會有Die-hard Fans，估唔到原來都好多人有興趣，所以希望啲黃牛可以用番正常價錢放飛，唔好咁猖狂，聽講賣成40倍，太過分！」她亦指想在演藝開騷是希望跟大家親密些，有心貼心的感覺。

「唱得好聽過佢點算？」

祖兒表示暫時只有一首歌需要排舞，但坦言揀歌有難度：「要諗點樣鋪排令起承轉合好啲，又諗緊係咪全部都係唱Side Track，因為顧慮有啲唔係Die-hard Fans。（會唔會參考網民意見揀歌？）我有睇過，但有啲好唔Side Track，但都幾真正反映民意。」她透露不會請嘉賓，但有考慮翻唱別人的歌：「一啲係我嘅心水歌，因為呢個叫Secret Live，係用音樂嚟講心事嘅騷。（會唔會唱男友劉浩龍嘅歌？）等人哋開騷先啦。」問到對方的歌可是她的心水歌，她冧笑說：「係......諗下先。（有冇試過喺公眾場合唱佢嘅歌？）冇，有咁嘅需要咩？唱得好聽過佢咁點算？」

催細佬結婚騰空間房

至於講到好友謝霆鋒被網友影到在香港機場跟女友王菲當眾咀嘴，祖兒笑言：「都幾Sweet，我諗佢都冇諗到會畀人睇到。」她又怕醜承認少在公眾場合錫錫：「盡少，盡可能忍住先，睇得出佢哋按捺唔住，真係好愛。（你有幾愛？）我就冇，所以先影唔到呢啲相。」另外，對於有指她弟弟搭上人妻空姐，祖兒表示：「我哋關係密切，同一屋簷下，多少都有講到，不過你哋唔係我屋企人，梗係唔同你哋講，佢咁大個人會處理，佢呢方面比我經驗老到，所以唔使擔心咁多，我都希望佢快啲結婚，騰空間房畀我。（媽咪有冇話想你騰空間房？）聽唔到有呢個訴求，細佬結婚同生BB先啦，生咗就當係我。（你幾時生？）40歲前。」

文：音樂組